BAKI,VOA Yusif Şərifzadə

İsrailli millətçi qruplar işğal altındakı Şərqi Qüdsün Köhnə Şəhərinin dar küçələrində yürüş keçirərək “Ərəblərə ölüm” və “Kəndləriniz yansın” kimi şüarlar səsləndiriblər.

VOA xəbər verir ki, hər il keçirilən “Qüds Günü” yürüşü İsrailin 1967-ci ildə Şərqi Qüdsü nəzarətə götürməsi və sonradan ilhaq etməsi hadisəsinə həsr olunur. Bu ilhaq beynəlxalq hüquq baxımından qanunsuz hesab edilir. Son illərdə yürüşlər ifrat sağçı qrupların təxribat xarakterli şüarları, fələstinlilərə və jurnalistlərə qarşı hücumlar səbəbindən dəfələrlə zorakılıq halları ilə müşayiət olunub.

Köhnə Şəhərin Via Dolorosa ərazisində yaşayan fələstinli Mustafa bildirib ki, israilli ultramillətçi gənclər evinin həyətinə daxil olublar:
“Bu qara gündür... Mən evdə idim, təxminən 20 məskunlaşmaçı həyətə daxil oldu. Onlar qapıları sındırdılar.”

Məlumata görə, Köhnə Şəhərdə fəaliyyət göstərən fələstinli mağaza sahiblərinin əksəriyyəti səhər saatlarından etibarən dükanlarını bağlayaraq ərazini tərk ediblər. Bəzi mağazalar isə Standing Together hərəkatının fəallarının nəzarəti altında fəaliyyətini davam etdirib. Fəallar fələstinli sakinləri və sahibkarları mümkün təzyiq və hücumlardan qorumaq məqsədilə müxtəlif nöqtələrdə yerləşdirilib.