BAKI,VOA,Yusif Şərifzadə

İsrailin insan hüquqları təşkilatı B’Tselem İordan vadisində yaşayan 47 fələstinli ailənin yaxın zamanda yaşadıqları əraziləri tərk etmək məcburiyyətində qala biləcəyini bildirib. Təşkilatın məlumatına görə, buna İsrail qüvvələri və məskunlaşanların həmin yaşayış məntəqələrinə gedən su xətlərini kəsməsi səbəb olub.

VOA xəbər verir ki, Ras əl-Əhmər, Sələ və Şərq Atuf yaşayış məntəqələrində ailələri su ilə təmin edən son boru xətlərinin də kəsilməsindən sonra 300-dən çox insan köçürülmə təhlükəsi ilə üzləşib. Onların təxminən yarısının uşaqlar olduğu bildirilir.

B’Tselem-in məlumatına görə, İsrail qüvvələri həmin ərazilərə suyun daşınmasına da mane olur. Bu vəziyyət yerli əhalinin gündəlik yaşayışını və təsərrüfat fəaliyyətini ciddi şəkildə çətinləşdirir.

Bölgədə yaşayan fələstinlilərin əsas dolanışıq mənbələri əkinçilik və heyvandarlıqdır. Su təchizatının dayandırılması həm insanların içməli suya çıxışına, həm də əkin sahələrinin və heyvanların su ilə təmin edilməsinə təsir göstərir.

B’Tselem yaranmış vəziyyətin ailələri yaşadıqları ərazilərdən çıxmağa məcbur edə biləcəyi barədə xəbərdarlıq edib. İsrail tərəfinin təşkilatın bu iddialarına münasibəti barədə məlumat verilməyib.

Eyni zamanda, İsrail İordan vadisinin şimalında təxminən 22 kilometr uzunluğunda ayırıcı səddin yaradılması üzərində işləyir. “Qırmızı xətt” adlandırılan səddin Eyn Şibli ərazisindən Təyasir nəzarət-buraxılış məntəqəsinədək uzanması nəzərdə tutulur.

Səddin tikintisi və su təchizatı ilə bağlı məhdudiyyətlər İordan vadisində yaşayan fələstinlilərin gələcəyi ilə bağlı narahatlıqları artırıb. İnsan hüquqları müdafiəçiləri bu tədbirlərin yerli icmaların yaşayış şəraitinə və dolanışıq imkanlarına ciddi təsir göstərə biləcəyini bildirirlər.