İsrail rəhbərliyinin son bəyanatları və hərbi addımları Fələstin torpaqlarında yeni və daha təhlükəli bir mərhələnin başladığına işarə edir. İsrail Baş naziri Benyamin Netanyahunun "Bir az çəki itirmişəm" şəklindəki istehzalı ifadəsi, əslində ölkə daxilindəki şəxsi məsuliyyətdən yayınma cəhdlərini və Qəzzada planlaşdırılan yeni hərbi-siyasi reallıqları pərdələmək məqsədi daşıyır. Bu bəyanatlar fonunda bölgədə hərbi əməliyyatların bərpası, torpaqların işğalı və məskunlaşma layihələrinin genişləndirilməsi istiqamətində ciddi hazırlıqlar aparılır.

İsrailli millətçi qruplar işğal altındakı Şərqi Qüdsün Köhnə Şəhərinin dar küçələrində yürüş keçirərək “Ərəblərə ölüm” və “Kəndləriniz yansın” kimi şüarlar səsləndiriblər. Son illərdə yürüşlər ifrat sağçı qrupların təxribat xarakterli şüarları, fələstinlilərə və jurnalistlərə qarşı hücumlar səbəbindən dəfələrlə zorakılıq halları ilə müşayiət olunub.

İsrail buldozerləri bu həftə Qüdsün cənub-şərqində yerləşən bir şəhər kənarında onlarla Fələstin dükanını sökərək işğal altındakı İordan çayının qərb sahilində məskunlaşma yolu layihəsi üçün ərazini təmizləyib. “Peace Now” adlı məskunlaşma əleyhinə qrupun direktoru bildirib ki, İsrail sökülən dükanların yerində yeni yol inşa etməyi planlaşdırır. Bu yol Fələstin hərəkətini yönləndirərək E1 bölgəsinin fələstinlilər üçün bağlanmasına səbəb olacaq.