BAKI,VOA Nailə Babazadə
Birləşmiş Ərəb Əmirliklərindən (BƏƏ) gələrək Nəsib sərhəd keçid məntəqəsi vasitəsilə Suriyaya daxil olan 200-dən çox avtomobilin Avropa bazarlarına daşınması üçün Laziqiyyə limanında gəmilərə yüklənməsinə başlanılıb.
VOA xəbər verir ki, bu haqda Suriyanın SANA agentliyi məlumat verib. Bu addım Suriya limanlarının logistik fəaliyyətindəki kəskin artımın və strateji əhəmiyyətinin göstəricisi kimi qiymətləndirilir.
Körfəz-Avropa xəttində strateji marşrut
Ərəb Körfəzi ölkələrini Suriya üzərindən Avropaya bağlayan inteqrasiya olunmuş tranzit marşrutu çərçivəsində İspaniya və Belçika da daxil olmaqla müxtəlif Avropa ölkələrinə 200-dən çox nəqliyyat vasitəsi yola salınır. Laziqiyyə Limanı Anbar İdarəsinin müdiri Məhəmməd Əbdürrəhman bildirib ki, bu, sözügedən marşrut üzrə limanda həyata keçirilən ilk bu növ yükləmə əməliyyatıdır. O, bu əməliyyatın Laziqiyyə limanını beynəlxalq ticarət dövriyyəsində perspektivli loqistik mərkəz kimi ön plana çıxardığını vurğulayıb.
Tranzit trafiki şaxələnir
Limanın texniki imkanlarının və heyətinin yükləmə proseslərini səmərəli şəkildə idarə etdiyini qeyd edən Əbdürrəhman, hərəkətliliyin təkcə avtomobillərlə məhdudlaşmadığını bildirib. Hazırda İraq və BƏƏ-dən gələn yanacaq daşımaları, eləcə də müxtəlif növ məhsullar limanın tranzit imkanlarına daxil edilib.
Yeni daşıma xətləri və 4 min avtomobillik sifariş
Ərəb Nəqliyyat Şirkətinin baş direktoru Abdulla əl-Nablusi limanın cəlbediciliyini artırmaq üçün yeni dəniz xətlərini şəbəkəyə əlavə etdiklərini bildirib. Türkiyə mərkəzli “Sidra Line” və bəzi Çin gəmiçilik xətlərinin dövrəyə girməsi ilə qlobal ticarət yollarındakı aksamalara qarşı praktiki alternativlər təqdim etdiklərini deyən əl-Nablusi: "Gəmi sahiblərini Laziqiyyə limanının etibarlı xidmət təqdim etdiyinə inandırdıq. Hazırda Körfəz ölkələri ilə Avropa və Şimali Afrika limanları arasında hərəkət edəcək 6 gəmi və 4 mindən çox avtomobil üçün rezervasiya mövcuddur", - deyə qeyd edib.
İqtisadiyyata birbaşa töhfə və infrastrukturun yenilənməsi
Əl-Nablusi vurğulayıb ki, tranzit əməliyyatları gəmi rüsumları, anbar və logistik xidmətlər vasitəsilə dövlət xəzinəsinə birbaşa gəlir gətirməklə yanaşı, sərhəd keçid məntəqələri ilə bağlı olan quru yolu nəqliyyatını da canlandırır. Bu proses ötən ilin sonunda tamamlanan genişmiqyaslı modernizasiya işlərinin nəticəsidir və Laziqiyyə limanını regionun əsas logistik mərkəzlərindən birinə çevirməyi hədəfləyir.