BAKI, VOA, Nailə Babazadə

İsrail ordusunun Livanın müxtəlif bölgələrinə təşkil etdiyi hava hücumlarında daha 17 nəfər həyatını itirib, 15 nəfər isə yaralanıb.

VOA xəbər verir ki, Livanın rəsmi xəbər agentliyi NNA-nın məlumatına görə, İsrail hərbi təyyarələri ölkənin cənubundakı Əl-Ənsariyyə qəsəbəsinə intensiv zərbələr endirib. Eyni zamanda, Sur şəhərinin cənub-şərqində yerləşən Hoş bölgəsində bir kafe İsrailə məxsus pilotsuz uçuş aparatı (PUA) tərəfindən hədəf alınıb. Səhiyyə Nazirliyi isə Beyrutun cənubundakı Avzai bölgəsində motosikletin hədəf alındığı hücumda bir nəfərin öldüyünü, Kana və Hoş qəsəbələrində isə ümumilikdə 6 nəfərin həlak olduğunu, çox sayda insanın yaralandığını açıqlayıb. Şərqi Zavtar, Kılaviyyə və Hinnaviyyə qəsəbələrində də ölümlə nəticələnən zərbələr qeydə alınıb.

İsrail ordusu həmçinin Livanın paytaxtı Beyrutun Dahiye bölgəsinə də yeni hava hücumları təşkil edib. Bölgə sakinlərini evlərini tərk etməyə məcbur edən İsrail qüvvələri son bir saat ərzində iki intensiv zərbə endirib və nəticədə şiddətli partlayış səsləri eşidilib. İsrail tərəfi bu hücumların "Hizbullah" infrastrukturunu hədəf aldığını iddia edərək Beyruta qarşı genişmiqyaslı əməliyyat başlatdığını elan edib. Livan Səhiyyə Nazirliyinin son məlumatlarına görə, 2 mart tarixindən bəri davam edən İsrail hücumlarında ölənlərin ümumi sayı 570-ə, yaralıların sayı isə 1444-ə yüksəlib.

Buna cavab olaraq "Hizbullah" İsrail hədəflərinə qarşı 26 hücum həyata keçirdiyini açıqlayıb. Təşkilatın yaydığı bəyanatda bildirilir ki, bu əməliyyatlar İsrailin Beyrut və ətraf qəsəbələrə endirdiyi zərbələrə cavab xarakteri daşıyır. "Hizbullah" qüvvələri İsrailə məxsus 8 hərbi toplanma nöqtəsi, 4 hərbi baza, 6 mövqe və kazarma, həmçinin 3 artilleriya mövqeyini və bir hərbi sənaye şirkətini hədəf alıb. Raket və topçu atəşləri ilə Hayfa şəhərinin şərqindəki Metula və Misgav Am yaşayış məntəqələri, Tel-Əvivin cənubunda yerləşən "Tel Hashomer" Baş Qərargah qərargahı və müxtəlif raketdən müdafiə obyektləri vurulub.

Hazırda Livanın cənubunda və paytaxt Beyrutda gərginlik ən yüksək həddə çatıb. İsrail ordusu havadan və dənizdən intensiv hücumlarını davam etdirərkən, quru əməliyyatlarını da genişləndirmək qərarına gəlib. "Hizbullah" isə Hiyam kəndi, Adisə və Mərkaba qəsəbələri yaxınlığındakı İsrail texnikasını və əsgərlərini hədəfə almağa davam edir. Beynəlxalq birlik bölgədəki humanitar vəziyyətin daha da pisləşməsindən və münaqişənin daha geniş ərazilərə yayılmasından ciddi narahatlıq ifadə edir.