BAKI,VOA

İspaniyanın xarici işlər naziri Xose Manuel Albares Ağ Evin mətbuat katibi Karolin Levittin İspaniyanın Yaxın Şərqdə ABŞ ordusu ilə əməkdaşlığa razılıq verməsi barədə dediyi bəyanatların həqiqətə uyğun olmadığını bildirib.

VOA xəbər verir ki, bu haqda Albares "Cadena SER" radiosuna açıqlamasında deyib.

"Bunu qəti şəkildə təkzib edirəm. İspaniya hökumətinin Yaxın Şərqdəki müharibə və hərbi bazalarımızdan istifadə ilə bağlı mövqeyi qətiyyən dəyişməyib".-deyə o qeyd edib.

Qeyd edək ki, Karolin Levitt Ağ Evdə keçirdiyi mətbuat brifinqində "İspaniyaya gəlincə, inanıram ki, onlar prezidentin dünənki mesajını yüksək və aydın şəkildə eşidiblər. Son bir neçə saatdakı məlumatıma görə, onlar ABŞ ordusu ilə əməkdaşlığa razılıq veriblər və ABŞ ordusu hazırda İspaniyadakı həmkarları ilə koordinasiya qurur".-demişdi.

Bu fikir mübadiləsi ABŞ Prezidenti Donald Trampın çərşənbə günü İspaniya ilə "bütün ticarət əlaqələrini kəsmək" təhdidindən sonra baş verib. Trampın bu hədəsi Madridin BMT Nizamnaməsi öhdəliklərinə daxil olmayan heç bir zərbə üçün İspaniyanın cənubundakı müştərək bazalardan istifadəyə icazə verməyəcəyini elan etməsindən bir gün sonraya təsadüf edib.