BAKI,AzerVoice, Fərid Mikayılov

Suriya prezidenti Əhməd əş-Şəraa ümumi amnistiya haqqında fərman imzalayıb.

AzerVoice xəbər verir ki, sənədə görə, bəzi cinayətlər üzrə cəzalar tamamilə ləğv edilir, ömürlük həbs və ömürlük nəzarət cəzaları isə 20 il müddətinə azadlıqdan məhrumetmə və ya nəzarətlə əvəz olunur.

Fərman ümumi qaydada xırda hüquqpozmaları və cinayətləri əhatə edir. Buraya narkotik maddələrlə bağlı bəzi hallar, qaçaqmalçılıq, maliyyə nəzarəti pozuntuları, qanunsuz valyuta əməliyyatları, subsidiyalı malların qanunsuz dövriyyəsi və istehlakçı hüquqlarının pozulması daxildir.

Bəzi cinayətlər üzrə isə şərti amnistiya tətbiq olunur. Məsələn, adam oğurluğu hallarında zərərçəkənin könüllü şəkildə və zərər ödənilmədən azad edilməsi əsas şərt kimi göstərilir. Silahla bağlı cinayətlərdə isə üç ay müddətində silahın təhvil verilməsi tələb olunur.

Eyni zamanda, sağalmaz xəstəlik səbəbindən köməyə ehtiyacı olan şəxslər və ya 70 yaşdan yuxarı məhkumlar üçün – cinayətin növündən asılı olmayaraq – daimi və ya müvəqqəti cəzalardan tam azadolma nəzərdə tutulur.

Fərman müvəqqəti həbs cəzalarının yarısının ləğvini, eləcə də azyaşlılar üçün tətbiq edilən reabilitasiya və nəzarət tədbirlərinin aradan qaldırılmasını nəzərdə tutur.

Bəzi hallarda amnistiyadan yararlanmaq üçün şübhəlilərin 60 gün ərzində könüllü təslim olması, şəxsi iddialardan imtina etməsi və ya öhdəliklərini yerinə yetirməsi tələb olunur. Şəxsi iddialarla bağlı müddətlər ayrıca müəyyən edilib.

Bununla yanaşı, “Suriya xalqına qarşı ciddi pozuntular”, işgəncə, insan alveri, fahişəlik, elektrik və telekommunikasiya xətlərinin oğurlanması, mütəşəkkil cinayətkarlıq və bəzi ağır narkotik cinayətləri amnistiyadan kənarda saxlanılıb.

Fərman kompensasiya xarakterli cərimələri əhatə etmir, lakin həbs cəzası ilə əlaqəli cərimələrə şamil olunur. Qərardan əvvəl ödənilmiş məbləğlərin geri qaytarılmayacağı qeyd edilib.