BAKI, AzerVoice, Nailə Babazadə

İsrailin intensiv hücumları altında olan Qəzza zolağının şimal bölgələrində internet və rabitə xidmətləri tamamilə dayandırılıb.

AzerVoice xəbər verir ki, Fələstinin telekommunikasiya şirkətləri tərəfindən yayılan yazılı açıqlamada bildirilib ki, İsrail ordusunun hücumlarının hədəfi olan Qəzza şəhəri və Şimal vilayətində sabit internet və əlaqə xidmətləri tamamilə kəsilib.

Açıqlamada qeyd olunub ki, İsrail ordusu bölgəyə rabitə və internet xidməti göstərən əsas xətləri hədəfə alıb və nəticədə xidmətlərdə kəsinti baş verib. Həmçinin, təhlükələrə baxmayaraq, rabitə xətlərinin bərpası üçün texniki işlərə başlanıldığı vurğulanıb.

Şahidlərin verdiyi məlumata görə, Qəzza şəhərinin bir çox məhəlləsində internet tamamilə kəsilib və əlaqə qurmaq mümkün deyil.

İsrail ordusu son 24 saat ərzində Qəzza zolağına 50-dən çox hava hücumu təşkil edib, bu hücumların əksəriyyəti dünən başlanan quru əməliyyatları çərçivəsində Qəzza şəhərinin şimalına yönəlib.

Eyni zamanda, İsrail ordusu bir tərəfdən Qəzza şəhərində yerindən edilmiş fələstinlilərin sığındığı evləri və çoxmərtəbəli binaları hədəfə alaraq dağıdır, digər tərəfdən isə bölgə sakinlərini Qəzzanın cənubuna – çadırların, ərzaq və xəstəxanaların olduğu iddia edilən ərazilərə köçməyə məcbur edir.