BAKI, AzerVoice, Nailə Babazadə
İsrailin Qəzzada tətbiq etdiyi sistemli aclıq siyasəti səbəbindən xəstəxanalar yetərsiz qidalanma nəticəsində dərisi-sümükləri görünən, ölümə yaxın olan uşaqlarla doludur. Aclıqdan ölənlərin sayı isə sürətlə artır.
AzerVoice xəbər verir ki, Qəzzadaki xəstəxanalarda uşaqlar aclıqdan ölümü gözləyirlər.
Aclıq səbəbindən baş verən ölümlər təhlükəli həddə çatıb. Qəzza Səhiyyə Nazirliyinin son məlumatlarına görə, yetərsiz qidalanma və aclıq səbəbilə ölənlərin sayı 146-sı uşaq olmaqla 428-ə yüksəlib.
Cənubda yerləşən Xan Yunis şəhərindəki Nasir Xəstəxanası, qida çatışmazlığından əziyyət çəkən, tibbi imkanların olmaması səbəbindən diaqnoz və müalicə oluna bilməyən xəstəliklərlə mübarizə aparan uşaqlarla doludur. Bu uşaqların bəziləri nə yeməyə bir şey, nə də qalmağa yataq tapa bilir və kömək əli uzanmasını gözləyirlər.
Qəzzadaki hökumətin media ofisinin məlumatına görə, Qəzzədə 650 min uşaq yetərsiz qidalanma, aclıq və ərzaq çatışmazlığı səbəbilə ölüm riski altındadır.
Nasir Xəstəxanasının Uşaq bölməsinin rəhbəri Dr. Əhməd əl-Ferra bildirib ki, aclıqdan ölüm halları avqust və sentyabr aylarında dəfələrlə artıb.
"Avqust ayında aclıq və yetərsiz qidalanma səbəbiylə ölüm halları zirvəyə çatdı. Sentyabrda isə avqustdan az olmayan, bəlkə də daha yüksək sayda ölüm gözləyirik" – deyə Ferra qeyd edib.
"Nasir Xəstəxanasındakı yetərsiz qidalanma poliklinikasında sərhəd qapıları bağlanmazdan əvvəl 20-30 nəfər görürdüksə, indi bu say 120-140 nəfərə çatıb. Onlardan 40-ı kəskin qidalanma çatışmazlığı kateqoriyasına aiddir. Bu, Qəzzada daha əvvəl görülməmiş bir vəziyyətdir." - deyə vurğulayıb.
Dr. Ferra vəziyyətin səbəblərini belə izah edib:
"Birincisi, Qəzzaya daxil olan yardım ehtiyacın yalnız 10 faizini qarşılayır. Yəni gündəlik 50 yardım yük maşını gəlir, amma Qəzzaya gündə 600 tır daxil olmalıdır. İkincisi, bu yardımlar ədalətli şəkildə paylanmır və ehtiyac sahiblərinə çatmır.
Üçüncüsü, daxil olan yardımlar insanların ehtiyaclarına görə yox, İsrailin istədiyinə görə təyin olunur. Yəni protein baxımından zəngin olan süd və süd məhsulları kimi qidalar daxil edilmir."
Yetərsiz qidalanma hallarının və xəstəxanalardakı pasiyent sıxlığının artdığını qeyd edən Ferra deyib:
"Xəstələr yataq tapa bilmir və dəhlizlərdə, pilləkan başlarında yatırlar. Bəziləri də xəstəxana həyətində qurulan çadırlarda müalicə olunur. Bu izdiham səbəbilə xəstəxanada bir fəlakət yaşanır."