BAKI, AzerVoice, Səməd Əyyubov

Birləşmiş Ərəb Əmirlikləri (BƏƏ) İsrailin baş naziri Benyamin Netanyahunun Qətərə qarşı hədələyici bəyanatlarını kəskin şəkildə pisləyib.

AzerVoice xəbər verir ki, bununla bağlı BƏƏ Xarici İşlər Nazirliyinin Strateji Kommunikasiyalar İdarəsinin direktoru Əfra əl-Hamli “X” sosial şəbəkəsində açıqlama yayıb.

“Qardaş Qətər dövlətinin təhlükəsizliyi və sabitliyi, Körfəz Əməkdaşlıq Şurası (KƏŞ) ölkələrinin təhlükəsizliyi və sabitliyinin ayrılmaz hissəsidir. Hər hansı Körfəz ölkəsinə hücum, birgə körfəz təhlükəsizlik sisteminə hücum deməkdir”, - bəyanatda vurğulanıb

Əl-Hamli əlavə edib ki, BƏƏ İsrailin çərşənbə günü səsləndirdiyi və Qətərə qarşı gələcək təhdidləri əks etdirən bəyanatları tamamilə rədd edir. O qeyd edib ki, bu təxribatçı və aqressiv ritorikanın davamı bölgədə sabitlik imkanlarını zəiflədərək, regionu son dərəcə təhlükəli ssenarilərə sürükləyə bilər.

Xatırladaq ki, Netanyahu ötən gün Qətərə xəbərdarlıq edərək bəyan etmişdi ki, ya Qətər HƏMAS rəsmilərini ölkədən çıxarsın, ya da onları ədalət qarşısına çıxarsın. "Əks halda, bunu biz edəcəyik” - deyə, o əlavə edib.

Cümə axşamı Qətərdə, əmir şeyx Təmim bin Həməd Al Taninin iştirakı ilə, İsrailin Dohada HƏMAS liderlərini hədəf alan misilsiz hava hücumu nəticəsində həlak olan altı nəfər - HƏMAS-ın beş üzvü və bir qətərli təhlükəsizlik əməkdaşı dəfn edilib.