BAKI, AzerVoice, Səməd Əyyubov

Yəmənin şimal-şərqindəki Marib vilayətində leysan yağışları, daşqınlar və güclü küləklər nəticəsində üç qaçqın həlak olub, təxminən üç min ailə zərər çəkib.

AzerVoice xəbər verir ki, bu barədə vilayətdəki qaçqın düşərgələrinin idarə olunmasına cavabdeh hökumət qurumu ilkin hesabat yayıb.

Hesabata görə, avqust ayında baş verən güclü yağışlar və daşqınlar nəticəsində üç nəfər ölüb, iki nəfər yaralanıb. Ümumilikdə 2 944 ailə zərər görüb. Onlardan 464 ailənin evləri və sığınacaqları tamamilə, 2 480 ailəninki isə qismən dağılıb.

Məlumatda bildirilib ki, 2 281 ailə yağış və daşqınlardan, 563 ailə isə güclü küləklərdən ciddi ziyan çəkib. Zərərlər arasında müvəqqəti sığınacaqların, çadırların və tor konstruksiyalarının dağılması, ərzaq ehtiyatlarının itirilməsi, su anbarları və kanalizasiya şəbəkələrinin sıradan çıxması, həmçinin ailələrin şəxsi əşyalarının məhv olması yer alır.

Ən çox zərər Marib şəhərindəki qaçqın düşərgələrində yaşayan ailələrə dəyib – ümumilikdə 1 895 ailə (261-i tam, 1 634-ü qismən). Vadi rayonunda 825 ailə (147-si tam, 678-i qismən), Rəğvan rayonunda 164 ailə (52-si tam, 112-si qismən), Harib rayonunda isə 60 ailə (4-ü tam, 56-sı qismən) ziyan görüb.

Hesabatda humanitar təşkilatlara müraciət edilərək, zərərçəkən ailələrə təcili ərzaq və sığınacaq yardımı göstərilməsi, qeyri-ərzaq məhsullarının təmin olunması, təhsil və səhiyyə obyektlərinin bərpası, kanalizasiya şəbəkələrinin təmiri ilə bağlı dəstəyin vacibliyi vurğulanıb.

Qurum həmçinin tərəfdaş təşkilatları fəlakətin təsirlərini azaltmaq üçün müdaxilələri gücləndirməyə, sığınacaqların bərpası və təmirinə, eləcə də vilayətin sərt iqliminə uyğun preventiv tədbirlərin görülməsinə dəvət edib. Eyni zamanda daşqınlar və yanğınlar da daxil olmaqla fövqəladə hallara qarşı ümumi qoruma strategiyasının hazırlanmasının vacibliyi qeyd olunub.