BAKI,VOA,Yusif Şərifzadə
Yəmən 2022-ci ildə BMT-nin vasitəçiliyi ilə əldə edilmiş atəşkəsdən sonra yenidən genişmiqyaslı müharibəyə qayıtmaq baxımından ən ciddi təhlükə ilə üzləşib. BMT-nin Yəmən üzrə xüsusi elçisi Hans Qrundberq ölkədə hərbi qarşıdurmaların genişləndiyini, eyni zamanda əhalinin yarıdan çoxunun kifayət qədər ərzaq əldə edə bilmədiyini bildirib.
VOA xəbər verir ki, Hans Qrundberq BMT Təhlükəsizlik Şurasında çıxışı zamanı Yəmənin müxtəlif cəbhələrində hərbi fəallığın artdığını deyib. Onun sözlərinə görə, husilərin Məarib, Hədramaut, Əl-Məxa və digər bölgələrdə həyata keçirdiyi son hücumlar həm hərbçilər, həm də mülki şəxslər arasında itkilərə səbəb olub.
Gərginliyin artması İranla yaxın münasibətlərə malik husilərlə Yəmənin beynəlxalq səviyyədə tanınan və Səudiyyə Ərəbistanının dəstəklədiyi hökumət qüvvələri arasında döyüşlərin şiddətlənməsi fonunda baş verir. Son qarşıdurmalar ölkənin yenidən genişmiqyaslı müharibəyə sürüklənə biləcəyi ilə bağlı narahatlıqları artırıb.
Qrundberq Yəməndəki hərbi gərginliyin yalnız ölkə daxilində deyil, bütövlükdə bölgədə təhlükəsizliyə təsir göstərə biləcəyi barədə xəbərdarlıq edib. Onun sözlərinə görə, mövcud vəziyyət siyasi həll imkanlarını zəiflətməklə yanaşı, humanitar böhranı da daha da ağırlaşdıra bilər.
BMT rəsmisi husilərin Qırmızı dəniz və Ədən körfəzində ticarət gəmilərinə hücumlarını yenidən artırmasına da diqqət çəkib. O bildirib ki, bu hücumlar Yəmənin daha geniş bölgə qarşıdurmasına cəlb olunması təhlükəsini artırır.
Bölgədə ticarət və enerji daşımaları Hörmüz boğazındakı böhran səbəbindən artıq ciddi təzyiq altındadır. ABŞ və İsrailin İranla müharibəsi fonunda Hörmüz boğazına nəzarət məsələsi tərəflər arasında əsas qarşıdurma mövzularından birinə çevrilib.
BMT-nin qiymətləndirməsinə görə, Yəməndə təhlükəsizlik vəziyyətinin pisləşməsi ölkədə onsuz da ağır olan humanitar şəraiti daha da dərinləşdirə bilər. Qrundberq əhalinin yarıdan çoxunun gündəlik ehtiyaclarını ödəyəcək qədər ərzaq əldə edə bilmədiyini vurğulayaraq yeni genişmiqyaslı müharibənin milyonlarla insan üçün ağır nəticələr doğuracağı barədə xəbərdarlıq edib.