BAKI, AzerVoice, Nərmin Ağayeva

İsrail əsgərləri Qəzzadakı Nasser xəstəxanasına hücumun yüksək hərbi komandirlərin razılığı ilə həyata keçirildiyini etiraf edib.

AzerVoice xəbər verir ki, İsrailin baş naziri Benyamin Netanyahu Qəzza zolağının cənubundakı Xan Yunisdə yerləşən Nasser xəstəxanasına edilən və 5-i jurnalist, 5-i tibb işçisi olmaqla 20 nəfərin həlak olduğu hücumu “faciəli qəza” adlandıraraq üzr istəyib. Lakin İsrailin Kanal 14 telekanalının hesabatına görə, hücumda iştirak edən əsgərlər bu əməliyyatın İsrail ordusunun yüksək komandanlığı tərəfindən təsdiqləndiyini və koordinasiya edildiyini açıqlayıb.

Qəzza Səhiyyə Nazirliyinin məlumatına görə, hücumda Reuters-dən Hosam əl-Masri, Əl-Cəzirədən Mohamed Salamah, Müstəqil Ərəbistan və AP-dən Məryəm Əbu Dekka, NBC News-dan Muaz Əbu Taha və Əhməd Əbu Əziz kimi jurnalistlər həlak olub. İsrail ordusu, 7 oktyabr 2023-cü ildən bəri Qəzzada 244 jurnalistin öldürüldüyünü rəsmən qəbul etsə də, jurnalistləri hədəf almadığını iddia edərək istintaqa başladığını bildirib.

Qeyd edək ki, bu hücum beynəlxalq ictimaiyyətdə geniş qəzəb doğurub və İsrailin Qəzzadakı hərbi əməliyyatlarının mülki şəxslərə və jurnalistlərə qarşı təhlükəsi bir daha gündəmə gəlib. Netanyahunun “kədərləndiyi” bəyanatları isə etiraf edilən hərbi razılaşma fonunda inandırıcılığını itirib.