BAKI, AzerVoice, Səməd Əyyubov
İsrail ordusu Qəzza şəhərinə hücumun ilkin mərhələsinə başlayıb.
AzerVoice xəbər verir ki, bu barədə İsrail ordusunun sözçüsü Efi Dferin yerli mediaya açıqlama verib.
“Qəzza şəhərində HƏMAS-a qarşı zərbələrimizi daha da gücləndirəcəyik. Hazırlıq əməliyyatlarına start vermişik. Girovların azad olunması üçün siyasi rəhbərliyin göstərişlərinə uyğun şərait yaradacağıq”, – deyə o bildirib.
Qeyd edək ki, İsrail müdafiə naziri İsrael Katz Qəzza şəhərinin tam işğalına dair ətraflı planı təsdiqləyib. Hazırda ordunun hava və artilleriya hücumları şəhərin həm cənub, həm də şimal hissələrində intensivləşdirilib.
Eyni zamanda, İsrail ordusu Qəzzanın cənubundakı Zeytun və Səbriyyə məhəllələrinə, şimaldakı Cəbəliyyə əl-Bələd və Cəbəliyyə ən-Nəzlə qəsəbələrinə güclü hava zərbələri endirib. Bundan əlavə, pilotsuz uçuş aparatları (PUA) həmin bölgələrə qayıdan sakinlərə təkrarən vərəqələr səpərək ərazini tərk edib cənubdakı əl-Mavasi bölgəsinə köçmələrini tələb edib.