BAKI, AzerVoice, Nərmin Ağayeva

HƏMAS Misir və Qətərin təqdim etdiyi atəşkəs təklifini qəbul etdiyini açıqlayıb.

AzerVoice xəbər verir ki, HƏMAS-ın sosial media hesabından yayılan bəyanatda təşkilatın və Fələstin fraksiyalarının vasitəçilər Misir və Qətərin təqdim etdiyi yeni atəşkəs planını təsdiqlədiyi bildirilib.

HƏMAS Siyasi Bürosunun üzvü Bassem Naim də açıqlamasında, “Hərəkat vasitəçilərin yeni təklifini qəbul etdi. Allahdan xalqımıza qarşı müharibənin dayandırılmasını diləyirik”, – deyə qeyd edib.

Məlumata görə, təqdim edilən təklif iyun ayında ABŞ-ın Yaxın Şərq üzrə xüsusi nümayəndəsi Stiv Vitkoffun planına əsaslanır. Təklifə görə, 60 günlük atəşkəs çərçivəsində HƏMAS 20 nəfərinin sağ olduğu güman edilən 50 israilli girovun təxminən yarısını iki mərhələdə azad edəcək. Paralel olaraq, davamlı atəşkəs istiqamətində danışıqlar aparılacaq.

Qeyd edək ki, HƏMAS nümayəndə heyəti ötən həftədən Qahirədə vasitəçilərlə görüşlər keçirir. Danışıqlara HƏMAS-ın baş müzakirəçisi Xəlil əl-Həyyanın rəhbərlik etdiyi bildirilir.