BAKI, AzerVoice, Səməd Əyyubov
İsrail Müdafiə Qüvvələri (SAXAL) Qəzza zolağında “İslami Cihad” qruplaşmasının iki sahə komandirini qətlə yetirib.
AzerVoice xəbər verir ki, bu barədə ordunun mətbuat xidməti məlumat yayıb.
Məlumata görə, həyata keçirilən əməliyyatlardan birində “İslami Cihad”ın “Beyt-Hanun” batalyonunun komandir müavini Murad Nasir Musa Əbu Cərad öldürülüb. Başqa bir analoji əməliyyat zamanı isə “Qəzza şəhəri” briqadasının tank əleyhinə bölməsinin komandir müavini Mahmud Şükri Dardsavi qətlə yetirilib.
Verilən məlumata əsasən, "hər iki şəxs 2023-cü il oktyabrın 7-də İsrailə qarşı hücumda iştirak edib, eləcə də İsrail vətəndaşlarına və hərbçilərinə qarşı hücumların planlaşdırılmasında və icrasında iştirak ediblər".
Bundan əlavə, digər əməliyyatlar zamanı bir neçə HƏMAS üzvü də öldürülüb.
Qeyd edək ki, İsrail ordusu bu əməliyyatların "terror təşkilatlarının komanda strukturunu dağıtmaq və onların terror fəaliyyətini əngəlləmək məqsədilə davam edən səylərin bir hissəsi" olduğunu bildirir.