BAKI, AzerVoice, Nailə Babazadə

İsrail rəsmiləri, 28 iyulda işğal altındakı İordan çayının qərb sahilində fələstin torpaqlarını zəbt edən bir israilli tərəfindən güllələnərək öldürülən, Oskar mükafatlı sənədli filmə töhfə vermiş fələstinli aktivist Avde Məhəmməd Hadalinin cənazəsini təhvil verib.

AzerVoice xəbər verir ki, Fələstinin rəsmi xəbər agentliyi WAFA-nın məlumatına görə, İsrail Hadalinin cənazəsini təhvil verib.

Hadalinin nəşinin dəfn olunmaq üçün onun doğulduğu Mesafir Yatta bölgəsindəki Umm əl-Hayr kəndinə aparılacağı bildirilib.

İsrail rəsmiləri əvvəllər Hadalinin cənazəsini təhvil verməkdən imtina edib, yas çadırı qurulmaması, başqa bir yerə dəfn olunması və cənazə mərasimində iştirak edənlərin sayının 15 nəfəri keçməməsi kimi şərtlər irəli sürüblər.

Qeyd edək ki, İsrail məhkəməsi Hadalini öldürdüyü anlara dair görüntüləri yayımlanan Levinin yalnız ev dustaqlığına alınmasına qərar vermiş, daha sonra isə “sübutların zəif olması” iddiası ilə onu sərbəst buraxmışdı.

Keçmiş ABŞ Prezidenti Co Bayden, Hadalini öldürən Leviyə fələstinli mülki şəxslərə hücumları səbəbindən sanksiya tətbiq etmişdi.

ABŞ Prezidenti Donald Tramp isə vəzifəyə gəldikdən sonra Leviyə qarşı tətbiq olunan sanksiyanı ləğv etmişdi.