BAKI, AzerVoice — Səudiyyə Ərəbistanının Mədinə şəhəri, Ümumdünya Səhiyyə Təşkilatı (ÜST) tərəfindən növbəti dəfə sağlam şəhər kimi akkreditasiyadan keçib. AzerVoice xəbər verir ki, İslamın ikinci müqəddəs şəhəri olan Mədinə bu statusu 80 bal toplayaraq qazanıb.

Mədinə əyalətinin valisi Şahzadə Salman bin Sultan, ÜST tərəfindən verilmiş akkreditasiya sertifikatını səhiyyə naziri Fəhd əl-Cəlacəldən qəbul edib. Təqdimat mərasimi cümə axşamı günü keçirilib.

Şahzadə Salman bildirib ki, bu nailiyyət ölkə rəhbərliyinin şəhərlərdə insanların həyat keyfiyyətini artırmaq istiqamətindəki səylərinin bariz nümunəsidir. O vurğulayıb ki, Mədinə regionu həm regional, həm də beynəlxalq səviyyədə aparıcı inkişaf modeli olaraq transformasiya prosesini davam etdirir və bu, Səudiyyə Ərəbistanının 2030 Vizyonu ilə uyğunluq təşkil edir.

Mədinə hal-hazırda Orta Şərqdə Ciddədən sonra ikinci ən böyük sağlam şəhər kimi mövqeyini möhkəmləndirib.

ÜST tərəfindən belə statusun verilməsi üçün 80-dən çox meyar nəzərə alınır. Bunlara parkların mövcudluğu, gəzinti zonaları, ilkin səhiyyə mərkəzləri və məktəblər vasitəsilə sağlamlığın təşviqi daxildir.

Qeyd edək ki, ÜST bu günədək Səudiyyə Ərəbistanında daha 14 şəhərə sağlam şəhər statusu verib. Bu şəhərlərə Taif, Tabuk, Əd-Diriyə, Unayzə, Cəlacəl, Əl-Məndəq, Əl-Cumum, Riyad əl-Xubra və Şarura daxildir.