BAKI,VOA

Ümumdünya Səhiyyə Təşkilatı kruiz gəmisində yayılan Hanta virusu ilə bağlı səkkiz nəfərin yoluxduğunu, onlardan üçünün həyatını itirdiyini açıqlayıb.

VOA xəbər verir ki, təşkilat yoluxma hallarından altısının laboratoriya üsulu ilə təsdiqləndiyini, iki nəfərin isə ehtimal olunan yoluxma halı kimi qeydə alındığını bildirib.

Məlumata görə, yoluxan şəxslərdə Hanta virusunun Andes ştammı Polimeraza Zəncirvari Reaksiya testi vasitəsilə müəyyən edilib.

Bildirilir ki, mayın 2-də virusla bağlı ilk məlumat yayılan zaman gəmidə 147 sərnişin və heyət üzvü olub. Bundan əvvəl isə 34 nəfər kruiz gəmisini tərk edib.

Hazırda dörd xəstə Cənubi Afrika Respublikası, Niderland və İsveçrədə xəstəxanalarda müalicə alır. Almaniyaya göndərilən şübhəli yoluxma halının isə mənfi nəticə verdiyi açıqlanıb.

ABŞ Xəstəliklərə Nəzarət və Profilaktika Mərkəzi vəziyyətin nəzarətdə saxlanıldığını bildirib. Mərkəz ABŞ vətəndaşlarının xüsusi tibbi təyyarə ilə Nebraska ştatının Omaha şəhərinə təxliyəsini planlaşdırır.

Gəminin operatoru olan “Oceanwide Expeditions” şirkətinin məlumatına əsasən, hazırda gəmidə 17 ABŞ vətəndaşı var.

Ümumdünya Səhiyyə Təşkilatı ümumi əhali üçün qlobal riskin aşağı səviyyədə olduğunu, lakin gəmidəki sərnişin və heyət üzvləri üçün riskin orta səviyyədə qiymətləndirildiyini bildirib.

Təşkilatın məlumatına görə, ilkin yoluxmuş şəxs virusa ehtimal ki, Argentina və ya Çiliyə səfəri zamanı yoluxub və virus daha sonra gəmi daxilində yayılıb.