BAKI, AzerVoice

İranın şimalındakı Gilan vilayətinə ötən gecə həyata keçirilən İsrail hava hücumu nəticəsində iranlı nüvə alimi Məhəmməd Rza Sədiqi Saber həlak olub.

AzerVoice xəbər verir ki, bu barədə yerli KİV-lər məlumat yayıb.

Məlumata əsasən, bir neçə gün əvvəl də Sədiqi Saberin Tehrandakı mənzilinə edilən hücumda onun 17 yaşlı oğlu ölmüşdü.

Qeyd edək ki, iki ay öncə ABŞ Xəzinədarlıq Departamenti Məhəmməd Rza Sədiqi Saberi nüvə silahlarının hazırlanmasında iştirakda ittiham edərək ona qarşı sanksiyalar tətbiq etmişdi.

Xatırladaq ki, 13 iyun səhərində İsrail İrana qarşı genişmiqyaslı hava zərbələri endirmişdi. Bu zərbələr nəticəsində yüksək rütbəli hərbçilər, generallar, nüvə alimləri və digər tanınmış şəxslər həlak olmuşdu.

Həmin günün axşamı İran “Doğru Vəd III” adını verdiyi əməliyyat çərçivəsində cavab hücumu həyata keçirərək Tel-Əviv də daxil olmaqla müxtəlif hədəflərə yüzlərlə ballistik raket və pilotsuz uçuş aparatı göndərmişdi. Hücum nəticəsində mülki itkilər qeydə alınıb və ciddi dağıntılar baş verib.