Bakı. AzerVoice:
İsrail və Hizbullah arasında qarşıdurmalar daha da güclənir.
AzerVoice xəbər verir ki, bu barədə Birləşmiş Millətlər Təşkilatının Livandakı Müvəqqəti Sülh Qüvvələri (UNIFIL) X sosial media hesabında açıqlayıb.
"Münaqişələr Mavi xəttin hər iki tərəfində (İsrail-Livan sərhədi) on minlərlə mülki şəxsin həyatına təsir edir və onları təhlükəyə atır. Hücumların getdikcə şiddətləndiyini və yayıldığını görürük. Son hadisələr siyasi həlli riskə atmaq potensialına malikdir", - deyə açıqlamada qeyd edilib.
Bundan əlavə, açıqlamada tərəflər bölgədə gərginliyin azaldılmasına, təhlükəsizlik və sabitliyin bərpasına zəmin yaradacaq diplomatik həll üçün çağırış edilib.
Qeyd edək ki, İsrailin 7 oktyabrdan bəri Qəzza zolağına təşkil etdiyi hücumlarda ən az 12 min 660-ı uşaq, 8 min 570-i qadın olmaqla, 30 min fələstinli həlak olub, 70 min nəfər isə yaralanıb.
Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir.
Qəzzada 1,9 milyon fələstinli havadan, qurudan və dənizdən edilən hücumlar səbəbilə didərgin düşüb.
İsrailin maneələri səbəbindən bölgəyə kifayət qədər yardım çatdırıla bilmir. Fələstinlilər bir tərəfdən İsrailin hücumları ilə, digər tərəfdən isə hər gün dərinləşən aclıqla mübarizə aparır.