BAKI, AzerVoice, Orxan Qədirzadə

İmralı Adasında həbsdə olan Abdullah Öcalan ilə keçirilən görüşdə ona ünvanlanan sualların məzmunu ilk dəfə olaraq üzə çıxıb.

AzerVoice-un verdiyi məlumata görə, TBMM daxilində fəaliyyət göstərən Milli Birlik, Qardaşlıq və Demokrasiya Komissiyasının üzvləri adaya gedərək Abdullah Öcalan ilə təxminən 2 saat 50 dəqiqə davam edən görüş keçiriblər. Heyətdə AK Parti sədrinin müavini Hüseyin Yayman, MHP sədrinin müavini Feti Yıldız və DEM Parti fraksiya rəhbərinin müavini Gülistan Kılıç Koçyiğit yer alıb.

Görüşün Milli Kəşfiyyat Xidməti (MİT) tərəfindən tam şəkildə qeydə alındığı və rəsmi protokol tərtib edildiyi bildirilir.

Qapalı görüşdən əldə edilən məlumata əsasən, Abdullah Öcalana əsasən PKK və Suriya kontekstində YPG ilə bağlı suallar yönəldilib. Komissiya üzvləri tərəfindən ona “PKK tərəfindən elan edilən özünü ləğv etmək və silah buraxma qərarının sahədə niyə icra olunmadığı” barədə sorğu təqdim edilib.

Həmçinin Öcalana “Suriya ərazisində YPG ilə bağlı problemin niyə həll olunmadığı” sualı verilib. Mənbələr bildirir ki, Abdullah Öcalan bu suallara cavab verib.

Görüşdən əldə edilən məlumatlar məhdud olsa da, komissiya üzvlərinin proseslə bağlı bütün narahatlıqları birbaşa şəkildə Abdullah Öcalana çatdırdığı qeyd olunur.