BAKI,AzerVoice, Orxan Qədirzadə
Türkiyə Böyük Millət Məclisinin (TBMM) Milli Dayanışma, Qardaşlıq və Demokratiya Komissiyasının üzvlərindən ibarət heyət İmralı Yüksək Təhlükəsizlikli Cəza-İcra Müəssisəsinə səfər edib.
AzerVoice xəbər verir ki, komissiyanın səfəri haqqında məlumatı TBMM Aparatı açıqlayıb. Bildirilib ki, səfər “prosesin irəlilədilməsi baxımından müsbət nəticələr verib”.
Məlumata görə, komissiya İmralıya səfər qərarını TBMM-də keçirilən səsvermə zamanı səs çoxluğu ilə qəbul etmişdi. Noyabrın 24-də baş tutan səfərdə üç nəfərlik heyət yer alıb. AK Partidən Hüseyn Yayman, MHP-dən Feti Yıldız və DEM Partidən Gülistan Koçyiğit heyətdə iştirak edib.
TBMM-dən verilən açıqlamada bildirilib ki, komissiya 5 avqust 2025-ci il tarixində fəaliyyətə başladıqdan sonra bu günə qədər 18 iclas keçirib və müxtəlif tərəflərlə dinləmələr aparıb.
“Komissiyanın 18-ci iclasında İmralı Yüksək Təhlükəsizlikli Cəza-İcra Müəssisəsində Abdullah Öcalanın dinlənilməsi barədə qərar səs çoxluğu ilə qəbul edilib. Qərara uyğun olaraq, 24 noyabr 2025-ci ildə heyət İmralıya gedib”- deyə açıqlamada qeyd olunub.
Görüşdə Öcalana 27 fevral tarixində elan edilən “Sülh və Demokratik ictimaiyyət Çağrısı”, təşkilatın özünü buraxması və silah qoyması ilə bağlı bəyanatlar, Suriyada həyata keçirilməsi nəzərdə tutulan 10 Mart razılaşması üzrə suallar ünvanlanıb və geniş izahatlar alınıb.
Açıqlamada deyilir ki, görüşün nəticələri “İctimai inteqrasiya, qardaşlığın möhkəmləndirilməsi və regional perspektivdən sülh prosesinin irəliləməsi baxımından müsbət qiymətləndirilir”.
TBMM ayrıca bildirib ki, komissiya qarşıdakı mərhələdə də məqsədlərinin həyata keçirilməsi istiqamətində “qətiyyət və ardıcıllıq nümayiş etdirəcək”.