BAKI, AzerVoice, Nailə Babazadə
Belçikanın paytaxtı Brüsseldə YPG/SDQ terror təşkilatının tərəfdarları tərəfindən keçirilən aksiya polisin sərt müdaxiləsi ilə dağıdılıb.
AzerVoice xəbər verir ki, məlumata görə, səhər saatlarında bir qrup YPG/SDQ tərəfdarı Avropa Parlamentinin binası qarşısında toplaşıb. Terror təşkilatını simvolizə edən bayraqlar qaldıran aksiyaçılar təşkilat lehinə şüarlar səsləndiriblər.
Bir müddət sonra asayişi pozan qrup polis tərəfindən müdaxiləyə məruz qalıb. Polis aksiyaçılara qarşı gözyaşardıcı qaz və su şırnağından istifadə edib.
Daha sonra aksiyaçılar sabah Avropa İttifaqı (Aİ) sammitinə ev sahibliyi edəcək Aİ Şurasının binasının yerləşdiyi Şuman meydanına doğru yürüş ediblər. Polis nəzarəti altında hərəkət edən qrup Aİ Xarici Əlaqələr Xidməti binasının qarşısında bir müddət dayanaraq şüarlar səsləndirdikdən sonra dağılıb.
Aksiya zamanı əraziyə helikopterlər, ictimai asayişə nəzarət üçün xüsusi texnika (TOMA) və çoxsaylı polis qüvvələri cəlb olunub.