BAKI, AzerVoice Analitik Təhlil Mərkəzi

Suriyada yeni administrasiya dövründə keçiriləcək ilk parlament seçkiləri təhlükəsizlik səbəbindən ölkənin cənubundakı Süveyda vilayətində, həmçinin Həsəkə və Rəqqa vilayətlərində baş tutmayacaq.

AzerVoice xəbər verir ki, bu barədə Suriyanın seçki komissiyası məlumat yayıb.

Komissiyanın açıqlamasına görə, Həsəkə və Rəqqa vilayətlərində də seçkilər yalnız “təhlükəsiz mühit” təmin edildikdən sonra keçiriləcək. Bu üç vilayətə ayrılmış yerlər seçkilər baş tutana qədər boş qalacaq.

Komissiya sözçüsü Nəvar Nacmə dövlət agentliyi SANA-ya açıqlamasında bildirib: “Seçkilər suveren bir məsələdir və yalnız tam hökumət nəzarəti altında olan ərazilərdə keçirilə bilər.”

Xatırladaq ki, iyul ayında İsrailin provokasiyası nəticəsində bəzi druzlar Suriya hökümət qüvvələrinə qarşı qiyam qaldırmışdı. İsrail, hökumət qüvvələri tərəfindən druzların kütləvi şəkildə öldürülməsini bəhanə edərək hava zərbələri ilə müdaxilə etdi.

Qeyd edək ki, ötən ay seçki komissiyasının rəhbəri 210 üzvlük Xalq Məclisi üçün səsvermənin 15–20 sentyabr tarixlərində keçirilməsinin planlaşdırıldığını açıqlamışdı.