BAKI, AzerVoice
İranın “Fars” xəbər agentliyi İsrailin 15 iyun tarixində Tehrana qarşı həyata keçirdiyi hava hücumu zamanı İran Prezidenti Məsud Pezeşkian, parlament sədri və məhkəmə hakimiyyətinin rəhbərinin hədəf alındığını iddia edib.
AzerVoice xəbər verir ki, agentliyin məlumatına görə, Pezeşkian Tehranda keçirilən İranın Ali Milli Təhlükəsizlik Şurasının iclası zamanı hücuma məruz qalıb və ayağından yüngül şəkildə yaralanıb. Hücumun məqsədinin üç yüksək vəzifəli rəsmiyə qarşı sui-qəsd olduğu bildirilib.
Həmçinin vurğulanıb ki, iclasın keçirildiyi binanın çıxış yollarını bağlamaq üçün altı raket və ya bomba istifadə olunub. Lakin rəsmi şəxslər fövqəladə çıxış qapısından qaçmağı bacarıblar. Pezeşkianın da binadan qaçarkən yaralandığı bildirilib. Hadisə ilə bağlı İsrailə məlumat ötürülüb-ötürülmədiyini müəyyən etmək üçün casusluq araşdırması başlandığı qeyd olunub.
Həmin hücumun Hizbullahın keçmiş baş katibi Həsən Nəsrullahın Beyrutda öldürülməsi ilə eyni sxem üzrə həyata keçirildiyi iddia olunub.
Qeyd edək ki, ötən həftə amerikalı jurnalist Taker Karlsona müsahibə verən Pezeşkian, İsrailin onu öldürməyə çalışdığını təsdiqləyərək deyib: “Onlar cəhd etdilər, bəli. Müəyyən addımlar atdılar, amma uğursuz oldular. Mən iclasda idim. İclas keçirdiyimiz əraziyə zərbə endirməyə çalışdılar. Bu, İsrail idi.”
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.