BAKI, AzerVoice
İsrailin 7 oktyabr 2023-cü ildən bəri Qəzza zolağında həyata keçirdiyi hərbi əməliyyatlar nəticəsində həyatını itirənlərin sayı 54 minə yaxınlaşıb.
AzerVoice xəbər verir ki, bu barədə Qəzza zolağının Səhiyyə Nazirliyi Telegram kanalında məlumat yayıb.
Məlumata görə, son sutka ərzində Qəzza zolağındakı xəstəxanalara 38 nəfərin cəsədi və 204 yaralı daxil olub. Bildirilib ki, statistikaya Şimali Qəzza vilayətindəki xəstəxanalarla bağlı məlumatlar daxil deyil, çünki həmin bölgələrə çıxış demək olar ki, mümkün deyil.
“7 oktyabr 2023-cü ildən bəri İsrailin hərbi təcavüzü nəticəsində ölənlərin sayı 53 min 939 nəfərə, yaralananların sayı isə 122 min 797 nəfərə çatıb” - deyə, məlumatda qeyd olunub.
Qeyd edək ki, martın 18-də İsrail ordusu Qəzza zolağında hərbi əməliyyatları bərpa edib, yanvar ayında elan edilən atəşkəs rejimini pozaraq bölgəyə kütləvi hava zərbələri endirib.
İsrail Baş naziri Binyamin Netanyahunun ofisindən verilən açıqlamaya görə, əməliyyatın əsas məqsədi bütün girovların azad olunmasıdır. Bildirilib ki, hərbi əməliyyatların bərpası, HƏMAS-ın ABŞ Prezidenti Donald Trampın xüsusi nümayəndəsi Stiven Uitkoff və digər vasitəçilərin irəli sürdüyü təklifləri qəbul etməməsi ilə izah olunur.
Öz növbəsində, HƏMAS hərəkatı isə hərbi toqquşmaların yenidən başlamasında məsuliyyətin İsrail və ABŞ-ın üzərində olduğunu bəyan edib.