BAKI,VOA,Yusif Şərifzadə

İran Hörmüz boğazında hərəkət edən gəmilər üzərində daha geniş nəzarət mexanizmi yaratmağa çalışır. Bu barədə Dohada yerləşən Ali Təhsil İnstitutunun professoru Mühənnəd Səllum bildirib.

VOA xəbər verir ki, Mühənnəd Səllum ABŞ-ın İrana qarşı son hərbi əməliyyatlarının əvvəlkilərlə müqayisədə daha geniş coğrafiyanı əhatə etdiyini, daha intensiv və daha dəqiq həyata keçirildiyini deyib. Onun sözlərinə görə, bu hücumlar davam edərsə, ABŞ ilə İran arasında mövcud anlaşmalar tamamilə qüvvədən düşə bilər.

Professor bildirib ki, İran Hörmüz boğazından keçən bütün gəmilərin öz nəzarəti altında hərəkət etməsini və bu keçidlərə görə ödəniş tətbiq edilməsini istəyir. O qeyd edib ki, Tehran bu məsələdə Omanla əməkdaşlıq etmək niyyətini açıqlasa da, Maskat belə bir mexanizmdə iştirak etməyə hazır olduğunu göstərməyib.

Mühənnəd Səllumun fikrincə, ABŞ isə İrana neft ixracı ilə bağlı tətbiq edilən güzəştləri ləğv etməklə Hörmüz boğazındakı vəziyyətə nəzarəti gücləndirməyə çalışır. Təhlilçi hesab edir ki, Vaşinqton bununla Tehrana mesaj verir: əgər İran boğazda gəmiçiliyə mane olmağa davam etsə, ABŞ ölkənin neft infrastrukturu və iqtisadiyyatına daha ciddi zərbələr endirə bilər.

O əlavə edib ki, İran uzun müddət hasil etdiyi nefti tankerlərdə və qurudakı anbarlarda saxlaya bilməz. Təhlilçinin qənaətinə görə, Tehran sonda ya neft ixracını hərbi vasitələrlə təmin etməyə çalışacaq, ya da ABŞ-ın tələblərini qəbul etmək məcburiyyətində qalacaq.