BAKI,VOA,Yusif Şərifzadə

İran Silahlı Qüvvələri İsrailə qarşı həyata keçirilən hərbi əməliyyatların başa çatdığını bəyan edib və yeni hücumlar olmadığı təqdirdə əməliyyatların davam etdirilməyəcəyini bildirib.

VOA xəbər verir ki, bu barədə İranın Xatəmül-Ənbiya Mərkəzi Qərargahının yaydığı bəyanatda qeyd olunub.

Məlumata görə, İran tərəfi İsrailə qarşı həyata keçirilən əməliyyatların başa çatdığını elan etsə də, Livana qarşı yeni hücumlar olacağı təqdirdə daha sərt tədbirlərin görüləcəyi barədə xəbərdarlıq edib.

Bəyanatda bildirilib ki, İsrailin Livanın cənubunda və Beyrutun Dahiyə bölgəsində həyata keçirdiyi hücumlara cavab olaraq İran Silahlı Qüvvələri Livan xalqına dəstək məqsədilə İsrailə qarşı cavab zərbələri endirib.

İran tərəfi əməliyyatların hazırda dayandırıldığını açıqlasa da, bölgədə vəziyyətin inkişafını diqqətlə izlədiyini vurğulayıb.

Açıqlama ABŞ Prezidenti Donald Trampın İsrail və İranı dərhal atəşi dayandırmağa çağırmasından sonra verilib. ABŞ lideri son hərbi əməliyyatların müharibənin dayandırılması və sülh razılaşmasının əldə olunması istiqamətində aparılan səyləri təhlükə altına saldığını bildirmişdi.

İsrail rəsmiləri İranın son bəyanatı ilə bağlı hələlik rəsmi açıqlama verməyiblər. Bununla yanaşı, İsrail tərəfinin müxtəlif hərbi variantları nəzərdən keçirdiyi barədə məlumatlar yayılıb.