BAKI,VOA,Yusif Şərifzadə

Səudiyyə Ərəbistanının dövlət neft şirkəti Saudi Aramco Yəməndəki husi hərəkatının hücumundan sonra Cizan şəhərində yerləşən və gündəlik 400 min barel emal gücünə malik neft emalı zavodunun fəaliyyətini müvəqqəti dayandırıb.

VOA xəbər verir ki, Reuters agentliyinin IR konsaltinq şirkətinin memorandumuna istinadən yaydığı məlumata görə, hücum nəticəsində zavodun inteqrasiya olunmuş qazlaşdırma kompleksi və neft anbarları zədələnib. Bildirilir ki, Saudi Aramco təmir işlərini avqustun 15-dək başa çatdıraraq müəssisənin fəaliyyətini mərhələli şəkildə bərpa etməyi planlaşdırır.

Yəməndə fəaliyyət göstərən husi hərəkatının hərbi sözçüsü Yəhya Səri isə şənbə günü yaydığı bəyanatda qruplaşmanın Cizan və Yənbu şəhərlərində Saudi Aramco obyektlərini uğurla hədəfə aldığını iddia edib. Onun sözlərinə görə, bu əməliyyat Yaxın Şərqdə münaqişənin genişləndiyini və qlobal enerji təchizatına təsirlərin davam etdiyini göstərir.

Reuters tərəfindən təsdiqləndiyi bildirilən sosial şəbəkə görüntülərində Cizan neft emalı zavodunun üzərində qalın tüstü sütununun yüksəldiyi görünür.

Saudi Aramco hücumun nəticələri və zavodun fəaliyyəti ilə bağlı təqdim olunan məlumatdan əlavə rəsmi açıqlama verməyib. Husi hərəkatının iddiaları isə müstəqil mənbələr tərəfindən tam şəkildə təsdiqlənməyib.