BAKI,VOA, Fərid Mikayılov

Yaxın Şərqdə artan gərginlik Avropada turizm davranışlarına təsir göstərməyə başlayıb.

VOA xəbər verir ki, İranla bağlı geosiyasi gərginliklər fonunda avropalı turistlər səyahət planlarında daha ehtiyatlı davranmağa başlayıblar. Bununla belə, səyahətə maraq yüksək olaraq qalır.

Məlumata görə, Avropa Səyahət Komissiyasının son araşdırmasına əsasən, avropalıların 82 faizi bu mövsümdə səyahət etməyi planlaşdırır. Bu, pandemiyadan sonra turizm sektorunda ciddi canlanmanın göstəricisi hesab olunur.

Bildirilib ki, təhlükəsizlik məsələsi artıq əsas prioritetlərdən birinə çevrilib. Sorğuda iştirak edənlərin 22 faizi səyahət edəcəkləri istiqamətin təhlükəsizliyini əsas amil kimi qiymətləndirib.

Qeyd olunub ki, xüsusilə 54 yaşdan yuxarı turistlər daha çox narahatlıq keçirir, gənc yaş qruplarında isə bu göstərici nisbətən aşağıdır.

Eyni zamanda, artan xərclər də turistlərin qərarlarına təsir edir. Uçuş biletlərinin qiymətinin əhəmiyyətli dərəcədə artması və büdcə məhdudiyyətləri səbəbindən avropalılar daha qısa müddətli və daha qənaətli səfərlərə üstünlük verirlər.

Məlumata görə, bəzi iri hava yolu şirkətləri, o cümlədən Lufthansa, yüksək yanacaq xərcləri səbəbindən bəzi marşrutları ləğv etmək qərarına gəlib.

Ekspertlər hesab edir ki, Hörmüz boğazında yaranan gərginlik qlobal enerji bazarına təsir göstərməklə yanaşı, aviasiya və turizm sektorunda da uzunmüddətli dəyişikliklərə səbəb ola bilər.