BAKI,VOA

İranın Ali Rəhbərinin beynəlxalq məsələlər üzrə müşaviri Əli Əkbər Vilayəti ölkəsinin regional təhlükəsizlik və diplomatik hədəfləri barədə kəskin bəyanatlarla çıxış edib.

VOA xəbər verir ki,Vilayəti İranın Hörmüz boğazı üzərindəki nəzarətini və müharibə itkiləri ilə bağlı tələblərini bir daha xatırladıb.

Əli Əkbər Vilayəti İranın xarici siyasət kursunun təməl prinsiplərinə toxunub.

"Bizim diplomatik tariximiz İranın qorunması əsasına söykənir və biz Hörmüz boğazının açarlarına sahibik."-deyə o qeyd edib.
Müşavir vurğulayıb ki, Tehran öz milli maraqlarını qorumaq üçün həm hərbi, həm də hüquqi müstəvidə addımlar atmaqda qərarlıdır.
"Xalqımızın hüquqlarını Hörmüz boğazına nəzarətdən başlayaraq müharibə təzminatlarının izlənilməsinə qədər hər bir sahədə müdafiə edəcəyik."-deyə o əlavə edib.

Vilayətinin bu sözləri ABŞ və İran nümayəndə heyətlərinin İslamabadda keçirilməsi planlaşdırılan görüşü ərəfəsinə təsadüf edir. Analitiklər hesab edirlər ki, "Hörmüz boğazının açarları bizdədir" ifadəsi Tehranın danışıqlar masasında öz mövqeyini gücləndirmək və beynəlxalq ticarət yollarını bir təzyiq rıçağı kimi istifadə etmək niyyətini göstərir. Eyni zamanda, "müharibə təzminatı" məsələsinin qaldırılması İranın sanksiyaların ləğvi ilə yanaşı, hərbi əməliyyatlar zamanı dəymiş ziyanın ödənilməsini də şərt kimi irəli sürəcəyindən xəbər verir.