BAKI,VOA, Fərid Mikayılov

İran Prezidenti Məsud Pezeşkian bildirib ki, ölkəsi nüvə silahı əldə etmək niyyətində deyil və regionda gərginliyin azalmasının tərəfdarıdır.

VOA xəbər verir ki, Pezeşkian Novruz bayramı münasibətilə video müraciətində çıxış edərək birlik və həmrəyliyin vacibliyini vurğulayıb.

O qeyd edib ki, Novruz İran mədəniyyətində yeni başlanğıc rəmzidir və mövcud şəraitdə buna hər zamankından daha çox ehtiyac var.

Prezident qonşu ölkələrlə münasibətlərdə problem yaşamaq istəmədiklərini bildirərək, bütün fikir ayrılıqlarını dialoq yolu ilə həll etməyə hazır olduqlarını deyib.

“Ümid edirik ki, münasibətlərdə yaranmış problemləri aradan qaldıra biləcəyik. Dost ölkələrlə bütün məsələləri həll etməyə hazırıq”- deyə Pezeşkian bildirib.

O vurğulayıb ki, İranda heç bir rəsmi şəxs kütləvi qırğın silahlarının hazırlanmasını dəstəkləmir və bu istiqamətdə addımlar atılmır. Pezeşkianın sözlərinə görə, ölkənin ali rəhbəri tərəfindən də nüvə silahlarının dini baxımdan qadağan olunduğu dəfələrlə bildirilib.

İran Prezidenti əlavə edib ki, regionda sabitliyin təmin olunması üçün Yaxın Şərq ölkələrinin iştirakı ilə yeni təhlükəsizlik mexanizminin yaradılması təklif olunur. Bu təşəbbüsün bölgədə sülh, təhlükəsizlik və sabitliyi təmin etməyə xidmət edəcəyi qeyd olunub.