BAKI, VOA, Nailə Babazadə

İranın ABŞ və İsrailin hücumlarına cavab olaraq 28 fevraldan bəri Körfəz bölgəsi başda olmaqla 7 ərəb ölkəsindəki ABŞ bazalarına və kritik nöqtələrinə ən azı 3955 hücum həyata keçirdiyi bildirilir.

VOA xəbər verir ki, Anadolu Agentliyinin bölgə ölkələrinin müdafiə nazirlikləri və informasiya mərkəzlərindən topladığı məlumatlara görə, bu hücumlardan ən çox təsirlənən ölkə Birləşmiş Ərəb Əmirlikləri (BƏƏ) olub.

BƏƏ Müdafiə Nazirliyi hücumların başlanğıcından bəri hava hücumundan müdafiə sistemlərinin 304 balistik raket, 15 qanadlı raket və 1627 PUA-nı zərərsizləşdirdiyini açıqlayıb. Küveyt hökuməti bu müddət ərzində 257 balistik raket və 516 PUA-nın, Bəhreyn isə 129 raket və 215 PUA-nın qarşısının alındığını bəyan edib. Qətər Müdafiə Nazirliyi ölkəyə 174 balistik raket, 84 dron və 2 ədəd Su-24 döyüş təyyarəsi ilə hücum edildiyini bildirib. İordaniya ordusu ölkəyə yönələn 204 raket və PUA-dan 187-nin məhv edildiyini, Səudiyyə Ərəbistanı isə ən azı 25 raket və 389 PUA hücumunun qeydə alındığını diqqətə çatdırıb. Oman Sultanlığı isə 16 PUA ilə hədəf alındığını bəyan edib.

İranın rəsmi xəbər agentliyi IRNA isə 28 fevraldan bəri 60 strateji hədəfə və ABŞ-İsrailə məxsus 500 hərbi nöqtəyə hücum təşkil edildiyini, bu əməliyyatlarda 700-dən çox PUA və yüzlərlə raketdən istifadə olunduğunu xəbər verib. İran Prezidenti Məsud Pezeşkian ölkəsinin qonşularla mehriban münasibətlərin tərəfdarı olduğunu bildirsə də, ABŞ və İsrailin hücumlarına qarşı özünü müdafiə hüququnun toxunulmaz olduğunu vurğulayıb.

Xatırladaq ki, ABŞ və İsrail fevralın 28-də İrana qarşı hərbi əməliyyatlara başlayıb. Bu hücumlar nəticəsində İranın ali lideri Ayətullah Əli Xamenei də daxil olmaqla çox sayıda yüksək rütbəli rəsmi həyatını itirib. İran rəsmilərinin məlumatına görə, ölkə daxilində ABŞ və İsrail zərbələri nəticəsində ölənlərin sayı 1348-i keçib, 17 mindən çox insan isə yaralanıb.