BAKI,VOA

İkinci Dünya müharibəsinin taleyini dəyişən ən mühüm hadisələrdən biri məhz bu gün baş verib.

1945-ci il mayın 7-də nasist Almaniyası Fransanın Reyms şəhərində Müttəfiq qüvvələrə qeyd-şərtsiz təslim aktını imzalayıb. Bununla da Avropada müharibənin sona çatması rəsmiləşdirilib.

Tarixi sənəd Almaniya Ali Komandanlığını təmsil edən general Alfred Yodl tərəfindən imzalanıb. Alman tərəfi əvvəlcə yalnız Qərb cəbhəsində döyüşən qüvvələrin təslim olması variantını irəli sürsə də, Müttəfiq qüvvələrin ali komandanı Duayt Eyzenhauer bütün Alman qüvvələrinin – həm Şərqdə, həm də Qərbdə – tam kapitulyasiyasını tələb edib.

Məlumata görə, Eyzenhauer Almaniyanın şərtləri qəbul etməyəcəyi halda Qərb cəbhəsini bağlamağa və alman qoşunlarının Sovet ordusuna təslim olmasının qarşısını almamağa hazır olduğunu bildirib. Bundan sonra Adolf Hitlerin varisi admiral Karl Dönits Yodla sənədi imzalamaq əmri verib.

Təslim aktı Sovet generalı İvan Susloparov və fransız general Fransуа Sevezin şahidliyi ilə imzalanıb. Müttəfiq Ekspedisiya Qüvvələri adından isə general Uolter Bedell Smit sənədə imza atıb.

Tarixçilərin fikrincə, Reymsdə imzalanan bu sənəd Avropada müharibənin faktiki sonunu rəsmiləşdirdi. Bununla belə, Şərq cəbhəsində döyüşlər daha bir gün davam edib.

Qeyd edək ki, sonradan Alfred Yodl Nürnberq məhkəməsində hərbi cinayətlərdə təqsirli bilinərək edam olunub.