BAKI,AzerVoice

Almaniyanın Nürnberq şəhərində 10 yüksək rütbəli nasist rəsmisi insanlığa qarşı cinayətlər, sülhə qarşı cinayətlər və II Dünya müharibəsi dövründə törədilmiş hərbi cinayətlərə görə asılmaqla edam edildi.

İki həftə əvvəl, Beynəlxalq Hərbi Cinayətlər Tribunalı həmin 10 nəfəri iki başqa nasist rəsmisi ilə birlikdə günahkar hesab etmiş və ölüm cəzasına məhkum etmişdi. Asılmaqla edama məhkum edilənlər arasında nasist Almaniyasının xarici işlər naziri Yoaxim fon Ribbentrop, Gestaponun qurucusu və Alman Hərbi Hava Qüvvələrinin rəhbəri Herman Göring, daxili işlər naziri Vilhelm Frik və işğal olunmuş Şərq əraziləri üzrə Reyx Nazirliyinin rəhbəri Alfred Rozenberq var idi.

Digər nasistlərdən bəziləri, o cümlədən Adolf Hitlerin keçmiş müavini Rudolf Hess, 10 ildən ömürlük həbsədək müxtəlif cəzalara məhkum edildi. Üç nəfər isə bəraət qazandı.

Təxminən 10 ay davam edən Nürnberq prosesi tarixdə ilk belə beynəlxalq məhkəmə idi. Məhkəməni ABŞ, SSRİ, Fransa və Böyük Britaniyanın nümayəndələrindən ibarət tribunal aparırdı. Təqsirləndirilən şəxslərə sülhə qarşı cinayətlərdən tutmuş, insanlığa və müharibə qanunlarına qarşı cinayətlərə qədər müxtəlif ittihamlar irəli sürülmüşdü.

1946-cı il oktyabrın 16-da nasist siyasətinin memarlarından 10 nəfər bir-bir edam olundu. Ölüm hökmü icra edilməzdən bir gün əvvəl “yəhudilərə qarşı repressiya proqramının yaradıcısı və müharibənin əsas təşəbbüskarı” adlandırılan Herman Göring zəhər içərək intihar etdi. Nasist Partiyasının rəhbərlərindən Martin Bormann isə qiyabi olaraq ölüm cəzasına məhkum edildi.