BAKI,AzerVoice
Uinston Leonard Spenser Çörçill – Böyük Britaniyanı və müttəfiqləri II Dünya müharibəsinin böhranından uğurla keçirməyi bacaran İngiltərə lideri – İngiltərənin Oksfordşir qraflığında yerləşən Blenheym Sarayında dünyaya gəlib.
Çörçill hərbçi ənənələrinə malik nüfuzlu bir ailədən gəlirdi və 1895-ci ildə atasının ölümündən sonra Britaniya Ordusunun 4-cü Hüsar alayına qoşuldu. Növbəti beş il ərzində Hindistan, Sudan və Cənubi Afrikada xidmət edərək parlaq hərbi karyera qurdu və bir neçə dəfə döyüşlərdə fərqləndi. 1899-cu ildə o, hərbi xidmətini tərk edərək ədəbi və siyasi karyerasına yönəldi və 1900-cü ildə Oldem dairəsindən Konservativ Partiyanın üzvü kimi parlamentə seçildi.
1904-cü ildə o, Liberallar Partiyasına keçdi və bir sıra mühüm vəzifələrdə çalışdı. 1911-ci ildə Britaniyanın Dəniz Qüvvələri üzrə Birinci Lordu təyin olundu və burada o, yaxınlaşmaqda olan müharibəni görərək donanmanın tam hazırlığa gətirilməsi üçün çalışdı.
1915-ci ildə, I Dünya müharibəsinin ikinci ilində Çörçill uğursuz Dardanel və Qallipoli əməliyyatlarına görə məsuliyyət daşıyan şəxs kimi qəbul edildi və müharibə koalisiya hökumətindən kənarlaşdırıldı. O, istefa etdi və Fransada piyada batalyonuna komandirlik etmək üçün könüllü oldu. Lakin 1917-ci ildə Lloyd Corcun rəhbərliyi ilə qurulan Liberal hökumətində yenidən kabinet üzvlüyünə qayıtdı. 1919–1921-ci illərdə hərb naziri vəzifəsində çalışdı, 1924-cü ildə isə Konservativ Partiyaya geri döndü və iki il sonra 1926-cı ildə baş vermiş Ümumi Tətilin qarşısının alınmasında aparıcı rol oynadı.
1929–1939-cu illər arasında vəzifədən kənarda qalan Çörçill Almaniya və Yaponiyanın təcavüz təhlükəsi barədə xəbərdarlıqlar etsə də, onun dediklərinə məhəl qoyulmadı.
Avropada II Dünya müharibəsi başlayan kimi o, yenidən Dəniz Qüvvələri üzrə Birinci Lord vəzifəsinə çağırıldı və səkkiz ay sonra zəif siyasəti ilə tanınan Nevill Çemberleni əvəz edərək yeni koalisiya hökumətinin baş naziri oldu. Onun hakimiyyətinin ilk ilində Britaniya təkbaşına nasist Almaniyasına qarşı dayanırdı. Çörçill isə həm ölkəsinə, həm də dünyaya britaniyalıların “heç vaxt təslim olmayacağını” bəyan etdi.
O, Britaniya xalqını qətiyyətli müqavimətə səslədi və Fridlin D. Ruzveltlə İosif Stalini uğurlu şəkildə koordinasiya edərək, nəticədə Ox müttəfiqlərini məğlub edən koalisiya qurdu.
İyul 1945-ci ildə, Almaniyanın kapitulyasiyasından cəmi 10 həftə sonra onun rəhbərlik etdiyi Konservativ hökumət Klement Ettlinin Leyborist Partiyasına qarşı seçkilərdə məğlub oldu və Çörçill baş nazirlikdən istefa etdi. O, müxalifət lideri oldu və 1951-ci ildə yenidən baş nazir seçildi. İki il sonra Kraliça II Elizabet tərəfindən rıtsar (sör) tituluna layiq görüldü və II Dünya müharibəsinə dair altı cildlik tarixi araşdırmasına və siyasi çıxışlarına görə Nobel Ədəbiyyat Mükafatını aldı.
1955-ci ildə baş nazirlikdən istefa versə də, 1964-cü ilə – ölümündən bir il əvvələ qədər parlamentdə fəaliyyətini davam etdirdi.