BAKI,VOA, Orxan Qədirzadə

5 aprel 1955-ci il tarixində Britaniyanın ən qüdrətli dövlət xadimlərindən biri, İkinci Dünya müharibəsi zamanı ölkəsini və müttəfiqləri qələbəyə aparan Sir Uinston Leonard Spenser Çörçill 80 yaşında baş nazir vəzifəsindən istefa verdi.

Çörçillin istefası Britaniya tarixində bir dövrün sonu kimi qəbul edilir. O, təkcə hərbi lider kimi deyil, həm də ədəbiyyat üzrə Nobel mükafatçısı və mahir natiq kimi dünya yaddaşında dərin iz qoyub.

Uinston Çörçillin həyatı və siyasi yolu

1874-cü ildə Blenhaym sarayında doğulan Çörçill hərbi karyerasına 1895-ci ildə başlayıb. Hindistan, Sudan və Cənubi Afrikada xidmət edərək döyüşlərdə fərqlənib. 1900-cü ildə Parlamentə seçilərək siyasi arenaya addım atıb.

1911-ci ildə Admirallığın Birinci Lordu təyin edilib. Lakin 1915-ci ildə uğursuz Qallipoli (Çanaqqala) əməliyyatına görə məsuliyyət daşıyaraq hökumətdən uzaqlaşdırılıb.

1930-cu illərdə Nasist Almaniyasının təhlükəsi barədə etdiyi xəbərdarlıqlara məhəl qoyulmasa da, müharibə başlayandan 8 ay sonra Nevill Çemberleni əvəz edərək baş nazir oldu.

Britaniyanın təkbaşına Almaniyaya qarşı dayandığı ən ağır illərdə o, xalqını müqavimətə səfərbər etdi. Ruzvelt və Stalinlə ittifaq quraraq Berlin-Roma-Tokio qüvvələrinin məğlub edilməsində həlledici rol oynadı.

Son illər və miras

1945-ci ildə seçkiləri uduzsa da, 1951-ci ildə yenidən baş nazir seçildi. 1953-cü ildə Kraliça II Elizabet tərəfindən cəngavər rütbəsinə layiq görüldü və ədəbiyyat üzrə Nobel mükafatını qazandı. 1955-ci ildə vəzifədən getsə də, 1964-cü ilə qədər Parlament üzvü olaraq qaldı.