BAKI,VOA

Yaxın Şərqdə davam edən müharibə enerji bazarlarını sarsıtdığı bir vaxtda, OPEC+ neft kartelinin səkkiz üzvü may ayından etibarən hasilat kvotasını gündəlik 206 min barel artıracaqlarını elan ediblər.

VOA xəbər verir ki,yeni kvota Səudiyyə Ərəbistanı və Rusiya ilə yanaşı, Tehranın zərbələrindən ən çox zərər çəkən BƏƏ və Küveyt kimi Körfəz ölkələri tərəfindən razılaşdırılıb. Lakin "Rystad Energy"nin analitiki Xorxe Leon bildirir ki, Hörmüz boğazı bağlı qaldığı müddətcə bu artım bazarlar üçün əhəmiyyətsizdir, çünki tədarük yolları kəsilib.

İranın son raket hücumu nəticəsində İsrailin şimalındakı Heyfə şəhərində yaşayış binasına ciddi ziyan dəyib. "The Times of Israel" qəzetinin məlumatına görə, hadisə nəticəsində dörd nəfər yaralanıb, onlardan birinin vəziyyəti ağırdır. Eyni zamanda, Livanın cənubundan İsrail istiqamətinə üç raket atılıb, İsrail aviasiyası isə cavab olaraq Sur bölgəsindəki Əl-Abbasıyə qəsəbəsini vurub.

İranın BMT-dəki missiyası Prezident Trampın mülki infrastrukturu (körpülər və elektrik stansiyaları) hədəf almaq barədə hədələrini kəskin pisləyib. Missiya bu bəyanatları "müharibə cinayəti törətmək niyyəti" və mülki şəxsləri terror etmək üçün birbaşa çağırış kimi qiymətləndirib. "Amnesty International" təşkilatının rəhbəri Aqnes Kallamard da bu təhdidləri "iyrənc" adlandıraraq, mülki əhalinin istilik, su və elektrikdən məhrum olacağını vurğulayıb.

İran Prezident Ofisinin rəsmisi Seyid Mehdi Tabatabai bildirib ki, İran Hörmüz boğazını yalnız müharibə zərərləri üçün kompensasiya ödəniləndən sonra açacaq. O, həmçinin Trampın ultimatuumunu "ümidsizlik və qəzəb dumanı" adlandırıb. Çinin xarici işlər naziri Van Yi isə rusiyalı həmkarı Sergey Lavrovla telefon danışığında vurğulayıb ki, naviqasiya məsələlərinin yeganə həlli atəşkəsə nail olmaqdır.

"Basra Oil Company" (BOC) ixracatın tamamilə dayandığını təsdiqləyib. Şirkət rəhbəri bildirib ki, gündəlik 900 min barel hasilat yalnız daxili ehtiyaclar üçündür. Xarici şirkətlər personalını təxliyə edir. Pakistan tərəfi isə müharibə səbəbindən dərinləşən iqtisadi böhran və yanacaq qiymətlərinin artımı ilə mübarizə aparır.