Bakı. AzerVoice:

Qazaxıstan Prezidenti Tokayev Əfqanıstanın regionlararası əlaqələrdə fəal şəkildə iştirak etməsini və bunun strateji baxımından prioritet olduğunu vurğulayıb.

AzerVoice xəbər verir ki, prezidentin mətbuat xidmətinin verdiyi açıqlamaya görə Qazaxıstan Talibanı “terror təşkilatları” siyahısından çıxarmaq qərarına gəlib.

Prezident Kasım Jomert Tokayev “Qazaxıstan müasir Əfqanıstanla ticari və iqtisadi əməkdaşlığın inkişaf etdirilməsinin vacibliyini və bu rejimin uzunmüddətli bir amil olduğunu başa düşərək, Taliban administrasiyasını terrorçular siyahısından çıxarıb” deyib.

Tokayev bu barədə Kollektiv Təhlükəsizlik Müqaviləsi Təşkilatına (KTMT) üzv ölkələrin parlament rəhbərləri ilə görüşündə bildirib.

Tokayev vurğulayıb ki, Əfqanıstanın regionlararası əlaqələrdə fəal şəkildə iştirak etməsi strateji baxımından prioritet məsələdir.

Həmçinin, mayın 27-də Rusiya Xarici İşlər Nazirliyi və Ədliyyə Nazirliyi prezident Vladimir Putinə Talibanın “terror təşkilatları” siyahısından çıxarıla biləcəyi barədə məlumat verib.

Ertəsi gün prezident Putin Talibanla münasibətlərin qurulması lazım olduğunu bəyan edərək, “bunlar ölkəni idarə edən insanlardır” deyib.

Qeyd edək ki, BMT Təhlükəsizlik Şurasının və Rusiya Federasiyası Ali Məhkəməsinin qərarı ilə 2003-cü ilin mart ayından etibarən Taliban Rusiyada “terrorçu qrup” kimi müəyyən edilib.