BAKI,VOA Orxan Qədirzadə

Rusiya ordusunun 2022-ci ildə Belarus ərazisi vasitəsilə Kiyevə hücum etməsindən dörd ildən artıq vaxt keçməsinə baxmayaraq, Ukrayna Belarusla olan dövlət sərhədinin möhkəmləndirilməsini davam etdirir. Kiyev rəsmiləri bildirirlər ki, hazırda Belarusda Rusiya qoşunlarının cəmləşməsinə dair əlamətlər müşahidə olunmasa da, mümkün təhlükələrə qarşı hazırlıq prioritet olaraq qalır.

Ukraynanın şimalındakı 1 084 kilometrlik Belarus sərhədi boyunca geniş müdafiə infrastrukturu yaradılıb. Vaxtilə iki ölkə arasında intensiv istifadə olunan sərhəd-keçid məntəqələri indi mülki şəxslər üçün bağlanıb və minalanmış ərazilərə çevrilib.

Sərhədə yaxın yolların böyük hissəsi pilotsuz uçuş aparatlarının hücumlarından qorunmaq məqsədilə xüsusi torlarla örtülüb. Ərazidə tikanlı məftillər, tank əleyhinə beton maneələr ("əjdaha dişləri") və digər müdafiə istehkamları quraşdırılıb.

Gərginlik fonunda təhlükəsizlik tədbirləri gücləndirilib

Bu ay Ukrayna ilə Belarus arasında münasibətlərdə gərginlik artmışdı. Kiyev Belarusdan Rusiya tərəfindən Ukrayna şəhərlərinə hücum edən pilotsuz uçuş aparatlarının fəaliyyət radiusunu artırmaq üçün quraşdırılmış rabitə ötürücü stansiyalarını sökməyi tələb etmişdi.

Ukrayna tərəfinin məlumatına görə, Belarus bu tələbi yerinə yetirib və bundan sonra iki ölkə arasında ritorika nisbətən yumşalıb.

Bununla belə, Ukrayna hakimiyyəti ehtiyat tədbirlərini davam etdirir və sərhəd xəttinin daha da möhkəmləndirilməsini zəruri hesab edir.

Belarusun mövqeyi

Belarus Prezidenti Aleksandr Lukaşenko dəfələrlə bəyan edib ki, ölkəsi hücuma məruz qalmadığı təqdirdə Belarus ordusu Rusiya-Ukrayna müharibəsinə qoşulmayacaq.

Lakin sərhədyanı ərazilərdə yaşayan sakinlər Belarusun gələcəkdə müharibəyə daha fəal şəkildə cəlb oluna biləcəyindən narahat olduqlarını bildirirlər.

Onların sözlərinə görə, yaradılmış müdafiə istehkamları bir tərəfdən müharibənin ilk günlərini xatırlatsa da, digər tərəfdən ölkənin mümkün təhlükələrə hazırlaşdığını göstərdiyi üçün təhlükəsizlik hissini gücləndirir.

Sərhəd gecə-gündüz nəzarətdə saxlanılır

Ukrayna Dövlət Sərhəd Xidməti sərhəd boyunca zirehli texnika, pilotsuz uçuş aparatları və müxtəlif müşahidə sistemlərindən istifadə etməklə fasiləsiz patrul xidməti həyata keçirir.

Ukrayna rəsmilərinin sözlərinə görə, Belarus Rusiyanın ən yaxın hərbi müttəfiqi olaraq qaldığı müddətdə sərhəd müdafiəsinin gücləndirilməsi uzunmüddətli prioritet olacaq.