BAKI, AzerVoice

İsrail ordusu Qəzza zolağındakı hərbi əməliyyatları dayandırmayınca, İsrail ərazisinə zərbələr endirməyə davam edəcəyik.

AzerVoice xəbər verir ki, bu sözlər Yəmənin “Ənsar Allah” (husilər) hərəkatının yaydığı bəyanatda yer alıb.

“Müsəlman ümmətimizin ləyaqətinin alçaldılmasına və İsrailin Qəzzada soyqırım törətməsinə sadəcə seyrçi qala bilmərik. Silahlı qüvvələrin əməliyyatları davam edəcək. Yəmənin Fələstinə dəstəyi İsrailin təcavüzü dayandırılana və Qəzza üzərindən blokada götürülənə qədər kəsilməyəcək” – deyə, bəyanatda bildirilib.

Xatırladaq ki, bundan əvvəl Yəmən ərazisindən İsrailə raket zərbəsi endirilmişdi. Raket qalıqlarının Ben Qurion hava limanına düşdüyü bildirilmişdi. İsrailin təcili yardım xidməti hadisədə dörd nəfərin yüngül və orta dərəcədə xəsarət aldıqlarını bildirib.

İsrailin dövlət televiziyası KAN hava limanının hücum səbəbilə uçuşlara bağlandığını bildirib.

Digər tərəfdən, "Ənsar Allah" hərəkatının sözçüsü Yəhya Səriə bildirib ki, bu hücum İsrail ordusunun Qəzza zolağında həyata keçirdiyi soyqırıma qarşı Fələstin xalqına dəstək məqsədilə edilib.

Səriə bildirib ki, Ben Qurion Hava Limanına hücum hipersonik ballistik raketlə həyata keçirilib və İsrail ilə ABŞ-ın hava müdafiə sistemləri bu raketi vurmaqda aciz qalıb.