Bakı, AzerVoice, Nailə Babazadə
Türkiyədə daxili işlər naziri vəzifəsinə yeni təyinat həyata keçirilib. “Rəsmi Qəzet”də dərc olunan Prezident qərarına əsasən, Daxili İşlər Nazirliyinə Ərzurum vilayətinin qubernatoru Mustafa Çiftçi təyin edilib. Təyinat Türkiyə Konstitusiyasının 104-cü və 106-cı maddələrinə uyğun olaraq reallaşdırılıb.
Mustafa Çiftçi uzun illər dövlət idarəçiliyi sahəsində müxtəlif vəzifələrdə çalışıb. O, 1970-ci ildə Konya vilayətinin Çumra rayonunda anadan olub. 1990-cı ildə Konya İmam-Xətib Liseyini bitirib.
1995-ci ildə Ankara Universitetinin Siyasi Elmlər Fakültəsinin Dövlət İdarəçiliyi ixtisasını başa vurub. 1996-cı ildə Daxili İşlər Nazirliyinin keçirdiyi rayon icra hakimiyyəti başçısı (kaymakam) namizədliyi imtahanını uğurla verərək 85-ci dövr Konya üzrə namizəd kimi dövlət qulluğuna başlayıb.
1998-ci ildə 8 ay müddətində Böyük Britaniyada olub, 1999-cu ildə isə Milli Təhlükəsizlik Akademiyasını bitirib. Karyerası ərzində Aksaray-Gülağaç, Ərzurum-Tekman, Nevşehir-Derinkuyu, Bitlis-Adilcevaz və Kırşehir-Kaman rayonlarında icra başçısı (kaymakam) vəzifəsində çalışıb. Bundan əlavə, Daxili İşlər Nazirliyinin Kadrlar Baş İdarəsində şöbə müdiri olub.
Mustafa Çiftçi Türkiyə Böyük Millət Məclisində Xüsusi Katiblik Müdiri və sədrin baş müşaviri vəzifələrini icra edib. 2018–2023-cü illərdə Çorum vilayətinin qubernatoru vəzifəsində çalışıb. 2023/376 saylı Prezident sərəncamı ilə 18 avqust 2023-cü il tarixində Ərzurum vilayətinin qubernatoru təyin olunub.
Təhsilini davam etdirən Çiftçi 2007-ci ildə Səlcuq Universitetində Dövlət İdarəçiliyi və Siyasi Elmlər ixtisası üzrə magistr dərəcəsi alıb. 2011-ci ildə Ankara Universitetinin İlahiyyat Fakültəsini bitirib. 2012-ci ildə Van Yüzüncü İl Universitetində Dövlət İdarəçiliyi üzrə daha bir magistr təhsilini tamamlayıb. Eyni zamanda Ankara Universitetində Ədliyyə, İqtisadiyyat və Beynəlxalq Münasibətlər ixtisaslarını bitirib. Hazırda Ankara Universitetinin Hüquq Fakültəsində təhsilini davam etdirir.
İngilis və ərəb dillərini bilən Mustafa Çiftçi ailəlidir və üç övladı var.