BAKI,VOA, Fərid Mikayılov

Türkiyə hüquq-mühafizə orqanlarının keçirdiyi əməliyyatlar nəticəsində beynəlxalq və milli səviyyədə axtarışda olan 54 şəxs ölkəyə qaytarılıb.

VOA xəbər verir ki, Türkiyə Daxili İşlər Nazirliyinin məlumatına əsasən, onlardan 29-u İnterpolun qırmızı bülleteni ilə beynəlxalq səviyyədə, 25-i isə ölkə daxilində axtarışda olan şəxslərdir.

Bildirilib ki, əməliyyat Emniyyət Baş İdarəsinin İnterpol-Avropol şöbəsi, Ədliyyə Nazirliyi əməkdaşları, KOM, Kəşfiyyat, Narkotiklərlə Mübarizə, Kibercinayətkarlıq, Asayiş və Terrorla Mübarizə idarələrinin koordinasiyalı fəaliyyəti nəticəsində həyata keçirilib.

Məlumata görə, Türkiyənin müxtəlif ölkələrin hüquq-mühafizə orqanları ilə əməkdaşlığı nəticəsində axtarışda olan şəxslər Gürcüstandan 38, Almaniyadan 5, Azərbaycandan 2, eləcə də Bolqarıstan, Avstriya, Ekvador, Fransa, Xorvatiya, Qazaxıstan, Misir, Yunanıstan və Şimali Makedoniyadan gətirilib.

Ölkəyə qaytarılan şəxslər arasında Türkiyədə fəaliyyət göstərən iki təhlükəli mütəşəkkil cinayət qruplaşmasının üzvlərinin də olduğu bildirilib.

Qırmızı bülletenlə axtarılan Barış Boyun cinayət təşkilatının üzvü Aslan Alkan Ekvadordan Türkiyəyə ekstradisiya edilib. O, qəsdən adam öldürmə və narkotik vasitələrin idxalı ilə bağlı ittihamlarla axtarışda olub.

Həmçinin Baygaralar cinayət təşkilatının üzvü Sedat Ok Almaniyadan Türkiyəyə gətirilib. O, planlaşdırılmış qətl ittihamı üzrə beynəlxalq axtarışda olub.

Türkiyə Daxili İşlər Nazirliyi açıqlamasında qeyd edib ki, mütəşəkkil cinayət təşkilatları və narkotik ticarəti ilə mübarizə dünyanın istənilən ölkəsində davam etdiriləcək və axtarışda olan şəxslərin ölkəyə qaytarılması istiqamətində tədbirlər davam etdiriləcək.