BAKI,VOA

Əsl adı Burak Özdəmir olan CZN Burak 1994-cü ildə İstanbulda anadan olub. O, əslən Hatay ilinin Yayladağı kəndindəndir. Burak Özdəmir sosial şəbəkələrdə paylaşdığı maraqlı yemək videoları ilə dünya şöhrəti qazanıb. Onun Instagram hesabı qısa müddətdə milyonlarla izləyici sayına çataraq böyük uğur əldə edib.

CZN Burakı digər aşpazlardan fərqləndirən əsas xüsusiyyət, videolarında gözünü kameradan çəkmədən və hər zaman gülərüzlə yemək bişirməsidir. Bu tərzi sayəsində o, internetdə "Smiley bae" fenomeni kimi tanınmağa başlayıb.

Karyerası və restoranlar şəbəkəsi

Aşpazlıq fəaliyyətinə atasının dəstəyi ilə başlayan Burak Özdəmir, 2011-ci ildə Aksarayda "Hatay Medeniyetler Sofrası" adlı kababxana açıb. Tekstil firması sahibi olan atasının yardımı ilə qurulan bu biznes, bir neçə il ərzində genişlənərək böyük bir restoranlar şəbəkəsinə çevrilib. Hazırda o, həm Türkiyədə, həm də xaricdə fəaliyyət göstərən məşhur restoranların sahibidir.

CZN nə deməkdir?

Bir çoxlarını maraqlandıran suallardan biri də "CZN" ləqəbinin mənasıdır. Burak Özdəmirin babası kababçılıqla məşğul olsa da, atası tekstil sənayesində fəaliyyət göstərirdi.

Burak bir müddət atasının tekstil firmasında işləyərkən, ora gələn xarici müştərilərdən birinin adı Cinzaro olub. O, bu adın qısaltması olan CZN ifadəsini özünə ləqəb olaraq seçib və bu ad sonradan onun dünya səviyyəli brendinə çevrilib.