BAKI,VOA Analitik Təhlil Mərkəzi, Orxan Qədirzadə

İsrail Daxili Cəbhə Komandanlığının "Tzeva Adom" (Qırmızı Rəng) xəbərdarlıq sistemindən əldə edilən son məlumatlar, 2026-cı il fevralın 28-də ABŞ və İsrailin İrana qarşı başlatdığı müharibədən bəri İsrail ərazisində həyəcan siqnallarının görünməmiş tezliklə səsləndiyini ortaya qoyub.

Müharibənin başladığı gündən bu yana İsraildə 8633 dəfə hava həyəcanı siqnalı verilib.

Təhdidlərin növü və intensivliyi

Məlumata görə, həyəcan siqnallarının pay bölgüsü belədir:

Raket hücumları - 6212 dəfə;

PUA (Dron) hücumları - 2414 dəfə;

İnfiltrasiya (sızma) cəhdləri - 3 dəfə.

Statistika göstərir ki, müharibənin ilk iki günü raket hücumları pik həddə çatsa da (1100 siqnal), dördüncü gündən etibarən İran və müttəfiqləri taktiki dəyişiklik edərək PUA-lara üstünlük verməyə başlayıblar.

Coğrafi bölgü - Şimal cəbhəsi daha çox vuruldu

İsrailin şimalı, xüsusilə Livanla sərhəd bölgələri ən çox hədəf alınan zonalar olub:

Şimal cəbhəsi - 3406 həyəcan siqnalı;

Samariya (İordan çayının qərb sahili) - 1228 həyəcan siqnalı;

Yuxarı Qaliley - 1079 həyəcan siqnalı.

Ən çox hücuma məruz qalan yaşayış məntəqəsi 222 siqnal ilə Kfar Şamuna kəndi olub. Onu 214 siqnal ilə Misgav Am şəhəri izləyir. İsrailin "Alma" mərkəzinin məlumatına görə, Hizbullahın atdığı raketlərin 71,5%-i sərhədin ilk 5 kilometrlik zonasını hədəf alıb.

İranın ballistik zərbələri və regional təsir

İsrail ordusunun martın 22-nə olan məlumatına görə, İran müharibənin əvvəlindən bəri 400-dən çox ballistik raket atıb. İsrail tərəfi itkilər və müdafiə sistemlərinin effektivliyi barədə ciddi senzura tətbiq etsə də, raket qəlpələrinin çox sayda yaralanmaya və infrastruktura ziyan vurduğu bildirilir.

Regional miqyasda isə İranın cavab zərbələri təkcə İsraillə məhdudlaşmayıb. Tehrandan əsasən Körfəz ölkələri olmaqla 7 ərəb dövlətinə ümumilikdə 6243 raket və PUA göndərildiyi rəsmi məlumatlarda yer alıb.

Prezident Donald Trampın çərşənbə günü elan etdiyi iki həftəlik atəşkəs razılaşması fonunda gərginlik hələ də davam edir. İran atəşkəsin Livanı da əhatə etdiyini israr etsə də, ABŞ və İsrail bunun yalnız İran-ABŞ cəbhəsinə aid olduğunu bildirir. Təkcə son sutkada İsrailin Livana endirdiyi zərbələr nəticəsində 254 nəfər ölüb, 1165 nəfər yaralanıb.

Bu gün isə ABŞ və İran nümayəndələri arasında Pakistanın vasitəçiliyi və ev sahibliyi ilə danışıqlar keçirildi.