BAKI,AzerVoice Analitik Təhlil Mərkəzi, Orxan Qədirzadə

ABŞ Prezidenti Donald Tramp administrasiyası İranla müharibənin yekun hədəfləri barədə ziddiyyətli bəyanatlar versə də, üç həftəlik intensiv bombardmanların xəritəsi real mənzərəni ortaya qoyur.

ABŞ və İsrailin vurduğu 7 800-dən çox hədəf İranın hərbi gücünün məhv edilməsindən tutmuş, rejim daxilində çevrilişə zəmin hazırlanmasına qədər geniş bir spektri əhatə edir.

Analitiklər hərbi əməliyyatların gedişatını üç əsas mərhələyə ayırırlar:

"Başsız Qoyma" Kampaniyası: 28 fevralda başlayan ilk hücumlar İranın ali siyasi və hərbi rəhbərliyini hədəf aldı. Ali Rəhbər Əli Xameneinin və SEPAH-ın yüksək rütbəli komandirlərinin öldürülməsi qərar qəbul etmə sistemini iflic etmək məqsədi daşıyırdı.

Daxili Təhlükəsizliyin Sarsıdılması: İkinci mərhələdə demək olar ki, bütün SEPAH qərargahları, Bəsic bazaları və polis idarələri hədəf alındı. Bu, rejimin daxili etirazları yatırmaq qabiliyyətini sıfıra endirərək, xalq üsyanlarına və silahlı qrupların fəallaşmasına yol açmaq planıdır.

İqtisadi İflas və İnfrastruktur Müharibəsi: İsrailin "Cənub Pars" qaz yatağına son zərbələri əhalini təməl ehtiyaclardan məhrum etmək və hökuməti çarəsiz qoymaq məqsədi güdür. Lakin bu addım Tramp və Netanyahu arasında gizli fikir ayrılıqlarını da üzə çıxarıb.

Maraqlıdır ki, İranın nüvə obyektləri ən az zərbə alan hədəflər sırasındadır. ABŞ Milli Kəşfiyyat Direktoru Tulsi Qabbardın etirafına görə, İranın nüvə zənginləşdirmə proqramı keçən ilki hücumlarla onsuz da məhv edilib.

Hazırda əsas döyüş Hüörmüz Boğazı ətrafında gedir. ABŞ-ın Xarq adasını ələ keçirmək planları və bölgəyə yerləşdirilən bunker-dağıdan bombalar, Vaşinqtonun boğazın açarlarını tamamilə öz əlinə almaq istədiyini göstərir. Pentaqon rəhbəri Pit Heqsetin 200 milyard dollarlıq əlavə büdcə tələbi isə müharibənin uzunmüddətli bir "erroziya müharibəsinə" çevrildiyinin rəsmi təsdiqidir.