BAKI,VOA, Fərid Mikayılov
Türkiyənin Xarici İşlər Naziri Hakan Fidan bildirib ki, ABŞ Prezidenti Donald Tramp 7–8 iyulda Ankarada keçiriləcək NATO Zirvəsinə qatılmağı planlaşdırır.
VOA xəbər verir ki, nazir qeyd edib ki, Rəcəb Tayyib Ərdoğan ilə Tramp keçən ay bir neçə dəfə telefon danışığı aparıb və hər dəfə NATO Zirvəsinə qatılacağını təsdiqləyib.
Fidan ABŞ-ın siyasi bəyanatlara baxmayaraq NATO-ya bağlılığını davam etdirdiyini və ittifaqdan çıxmaq planlarına dair heç bir göstərici olmadığını vurğulayıb. O bildirib ki, ABŞ müttəfiqləri müdafiə xərclərini artırmağa və öz təhlükəsizlikləri üçün daha çox məsuliyyət daşımağa davamlı təzyiq edir.
Fidan həmçinin ABŞ-İran arasında aparılan müzakirələrdə Türkiyənin dəstəyini qeyd edərək, hər iki tərəfin atəşkəsi uzatmaq üçün səylər göstərdiyini vurğulayıb. O, atəşkəsə baxmayaraq İsrail ordusunun Livan cənubunda Hizbullah-a qarşı hücumlarının müzakirələr üçün “önəmli risk” təşkil etdiyini qeyd edib.