BAKI,VOA Orxan Qədirzadə

Türkiyənin Fənərbaxça futbol komandasını daşıyan avtobusa 2015-ci ildə Trabzonda silahlı hücumla bağlı istintaq çərçivəsində 5 şübhəli saxlanılıb.

Türkiyənin ədliyyə naziri Akın Gürlek bildirib ki, 4 aprel 2015-ci ildə Trabzonda Fənərbaxça futbol komandasının avtobusuna edilən silahlı hücumla bağlı iş yenidən araşdırılıb.

Nazirin sözlərinə görə, Ədliyyə Nazirliyinin Cinayət İşləri Baş İdarəsinin nəzdində yaradılan Açılmamış Cinayətlərin Araşdırılması İdarəsi tərəfindən iş üzrə mövcud sübutlar yenidən qiymətləndirilib.

Araşdırma zamanı yeni texnoloji imkanlardan və müasir istintaq üsullarından istifadə edilib. Trabzon Baş Prokurorluğunun apardığı istintaq çərçivəsində yeni HTS və baza stansiyası analizlərindən əldə olunan məlumatlar əsasında 5 şübhəliyə qarşı əməliyyat keçirilib.

Trabzon Polis İdarəsi şübhəlilərin ünvanlarında axtarış əməliyyatları aparıb. Onlarla bağlı zəruri hüquqi prosedurlara başlanılıb.

2015-ci ildə nə baş vermişdi?

4 aprel 2015-ci ildə Fənərbaxça futbol komandasını daşıyan avtobus Trabzonun Sürmene rayonunda silahlı hücuma məruz qalmışdı.

Hücum nəticəsində avtobusun sürücüsü ağır yaralanmış, futbolçular və klub əməkdaşları isə təhlükəli vəziyyətlə üzləşmişdi. Hadisə Türkiyə futbol tarixində uzun müddət açılmamış cinayət işi kimi gündəmdə qalıb.

Akın Gürlek bildirib ki, yeni istintaqın əsas məqsədi hücumun arxasında dayanan şəxs və ya şəxslərin konkret sübutlarla müəyyənləşdirilməsidir.

Nazir qeyd edib ki, hücumun hansı komandaya, idmançıya və ya azarkeş qrupuna qarşı törədilməsindən asılı olmayaraq, Türkiyənin idmanda zorakılığa münasibəti dəyişməzdir.

Gürlek həmçinin bildirib ki, istintaqın gedişi sona qədər izləniləcək və heç bir şəxsin əsassız şəkildə ittiham altında qalmasına, eləcə də hər hansı hücumun açılmamış cinayət olaraq qalmasına yol verilməyəcək.