BAKI,VOA Orxan Qədirzadə

Türkiyənin vitse-prezidenti Cevdet Yılmaz Tehrandakı Sədabad Sarayında İran Prezidenti Məsud Pezeşkian ilə görüş keçirib.

ABŞ və İsrailin hücumları nəticəsində həlak olan İranın mərhum ali lideri Əli Xameneinin xatirəsinə həsr olunmuş dövlət mərasimində iştirak etmək üçün İrana səfər edən Cevdet Yılmaz görüş barədə "X" sosial şəbəkəsindəki paylaşımında məlumat verib.

Yılmaz bildirib ki, Türkiyə son dövrdə ağır hadisələr yaşayan qardaş İran xalqının kədərini səmimi şəkildə bölüşür.

"Türkiyə regionumuzda davamlı sülh və sabitliyin təmin olunmasına, dialoq kanallarının gücləndirilməsinə və müharibədən sonrakı normallaşma prosesinin dəstəklənməsinə yönəlmiş səylərə bundan sonra da töhfə verməyə davam edəcək", – deyə o qeyd edib.

Türkiyənin İranla ikitərəfli münasibətlərin, ilk növbədə iqtisadiyyat, ticarət, enerji və nəqliyyat sahələrində daha da inkişaf etdirilməsi istiqamətində birgə fəaliyyətini davam etdirmək niyyətində olduğunu vurğulayan Yılmaz, İran Prezidentinə səmimi qəbula görə təşəkkür edib.

Vitse-prezident paylaşımında həmçinin bildirib: "Uca Allahdan dünyasını dəyişən bütün iranlı qardaşlarımıza, ilk növbədə İnqilabın Ali Rəhbəri Əli Xameneiyə rəhmət diləyir, İran dövlətinə və dost, qardaş İran xalqına bir daha dərin hüznlə başsağlığı verir, səbir arzulayıram."